الرئيسية > آراء > مافيا مصحات خاصة. شكون يوقفها وعلاش كلشي متواطئ معاها وكيفاش شي صحف كتزين صورة بعضها اللي ما كيتخلص الا بالكاش وداير ما بغى وكيكملها بالحج كل عام
13/05/2019 09:30 آراء

مافيا مصحات خاصة. شكون يوقفها وعلاش كلشي متواطئ معاها وكيفاش شي صحف كتزين صورة بعضها اللي ما كيتخلص الا بالكاش وداير ما بغى وكيكملها بالحج كل عام

مافيا مصحات خاصة. شكون يوقفها وعلاش كلشي متواطئ معاها وكيفاش شي صحف كتزين صورة بعضها اللي ما كيتخلص الا بالكاش وداير ما بغى وكيكملها بالحج كل عام

كود هناء ابو علي ///

زهير الشرفي الكاتب العام لوزارة المالية ما بقاش كيخلعهم. لمغاربة كيكرهوهش. حقاش كل واحد فيهم وقعات لو شي حادثة غريبة معاهم. كنتكلمو على صحاب لكلينيكات الخاصة. طبعا ماشي كلهم فسلة وحدة. غير هو الرد ديال تنظيمهم المهني على تصريحات الشرفي في المناظرة الوطنية الاخيرة للضرائب زاد كفس صورتهم لمقودة بزاف.

الشرفي قال باللي ماشي معقول ولا من باب المواطنة شي مصحات ترفض الاداء بالشيك. ودعا لتدخل التنظميات المهنية. هو عندو معطيات اكثر على شكون كيخلص الضرائب وشحال. ما جبدش هاد الشي. ناضت جمعيتهم المهنية =ديال صحاب لكلينيكات= قالت غادية تدعيه. خاص كاع المسؤولين يكررو نفس الهدرة تضامنا مع الشرفي. كيفاش شي مصحات كتشتاغل بحال شي مافيا وعوض ما تنوض هاد المنظمة المهنية دير النقد الذاتي ولات خدمتها هي تهاجم للي هاجم القطاع.

كاينين مصحات خاصة مواطنة. غير هي اقلية ماشي اغلبية. هاد المصحات رافضة التخلويض. رافضة الفساد. هاد الجمعية الوطنية لارباب لكلينيكات الخاصة قالت بشكل رسمي باللي ما يمكنش ليها تقبل الشيك. يالله واعلى ما فخيلكم ركبوه يا الدولة يا الضرائب يا كاع المواطنين. علاش هاد الجمعية ما عمرها هدرات وهي كتشوف صحاب هاد لكلينيكات غاديين ويترفحو وفيهن اللي وسع استثماراتو ودار العقار ومراكز التدليك والماساج ولقهاوي وهاد الشي بلا ما يخلص الضريبة اللي خاصو يخلصها.

الشرفي راه باش هدر عرف علاش هدر. المسؤولية جماعية. مسؤولية الحكومة من خلال وزارة الصحة ومراقبتها لهاد لكلينيكات. كانت لجان هادي سنوات وقالت باللي شي كلينيكات ما خاصهاش تفتح كاع وتسدو شي وحدين. دور المجتمع من خلال جمعيات المجتمع المدني المكلفة بالصحة. هنا كاينة مصالح كثيرة كتخلي شي جمعيات خدامة لهاد الكلينيكات. دور الصحافة اللي فيها شي وحدين كيصبغو فهاد لكلينيكات. كاينين صحاب كلينيكات ديما حاضرين كيقدموهم بحال شي منقذ والحال ان مول هاد الشي وعندو كلينيك ديال العين كيتخلص بالكاش فالعموم. الخدمة فظروف ماشي مهنية. الوقت اللي كيدوزو مع لمريض سواء فالحفص او فالعملية قصير بزاف. سوق وصافي. كلشي عارف هاد الشي وكنلقاوه بطل فصحف معينة. هاد العينة كيجمع لفليسات وكتمشي للحج تقريبا كل عام حقاش عارفة اش كدير.

المسؤولية كذلك مسؤولية هاد التنظيم ديال لكلينيكات. خاصو ينقي باب دارو. خاصو يحيد الصورة لمقودة اللي عند لمغاربة على لكلينيكات. صورة كان عبر عليها الفنان الساخر حسن الفد فاحدى حلقاته الساخرة قبل سنوات وربط بين الطبيب والكزار. الكبدة بثمن والرئة بثمن والراس بثمن.

اليوم هادو ما قادرهم حد. ما خايفين من حد. قطاع الصحة فاشل حقاش القطاع العام فاشل. هاد الفشل الشامل خلى القطاع الخاص ياخد بلاصة كبر منو. باش يطور هاد القطاع خاص يولي عندنا قطاع عام مزيان. يعني قدامنا وقت طويل وقدام عدد من لكلينيكات سنوات ضوئية ديرو ما بغاو

موضوعات أخرى

25/05/2019 16:30

الثروة الجزائرية وتغيير النظام دايرين قلق ف الخارجية المغربية وكتقرا أثيرهم المستقبلي على مسلسل المفاوضات ف الصحراء

25/05/2019 16:00

كيف ما بزاف ديال المغاربة كيولي عندهم الإيمان زايد نغزة فرمضان، كذلك كتولي عندهم قلة الترابي وعدم إحترام القانون والوسخ والخنز زايدة نغزة حتى هي

25/05/2019 15:30

الموسم الفلاحي 2018 -2019 بالارقام: المغرب نتج 61 مليون هكتار والغلة جابت 48,3 مليون قنطار من الگمح.. وارتفاع مؤشر تصدير المواد الفلاحية بقيمة واصلة لـ 18،9 مليار درهم