الرئيسية > آش واقع > مافيا لكلينيكات ما حركاتش غير الممثلين بل خدمات الصحافة وجابت شركات تواصل تبيض صورتهم الكحلى وبرلمانيون من الباطرونا بحقارة كيدافعو عليهم
26/11/2020 12:00 آش واقع

مافيا لكلينيكات ما حركاتش غير الممثلين بل خدمات الصحافة وجابت شركات تواصل تبيض صورتهم الكحلى وبرلمانيون من الباطرونا بحقارة كيدافعو عليهم

مافيا لكلينيكات ما حركاتش غير الممثلين بل خدمات الصحافة وجابت شركات تواصل تبيض صورتهم الكحلى وبرلمانيون من الباطرونا بحقارة كيدافعو عليهم

كود هناء ابو علي ////

النائبة البرلمانية عن حزب الاتحاد الاشتراكي حنان رحاب دارت مداخلة فالبرلمان هاجمات فيها لكلينيكات. قبل قليل فرشات خطة هاد لكلينيكات. كتبات على صفحتها على الفايس “الذين يبيضون ” وجه ” المصحات الخاصة على صفحات الجرائد والمواقع الاخبارية والإذاعات كيف يشعرون وهم يرون شهادات لمواطنين ومواطنات يعانون الويلات بسبب التعاملات غير الشفافة لهذه المصحات”.

اللي لمحات ليه هو ان صحاب لكلينيكات اللي تغناو على ظهر المواطنين فهاد الجايحة وجمعو فلوس كثيرة بزاف من معاناة اسر مغربية٬ لجئو لشركات باش تقاد ليهم صورتهم الموسخة عند الرأي العام. دابا عندهم اكثر من شركة كتخدم معاهم. كتروج فايك نيوز باش يغلطو الراي العام.

ما قام به الممثل سعيد الناصري مع مصحة عليها 4 شكايات وفضايح كثيرة وكانت كتقلب 12 مليون باش يدخل عندها المصاب بالفيروس: جزء من هاد المخطط.

هاد الشركات وصلات للبرلمان ودابا وفق برلمانيين ل”كود” ولاو شي وحدين من الباطرونا =مجلس المستشارين= خدمتهم يدافعو علي هاد المافيا. مصادر برلمانية قالت باللي لفضيحة ان هناك تداخل المصالح بيناتهم وعلى هاد الشي بداو حملة كبيرة. برلماني اكد ل”كود” باللي كيتاصلو بكاع اللي كيعرفو صحافيين ومؤثرين …. باش يدوزو رواياتهم اللي كلها كذوب وباش يدوزو ميساجاتهم.

دابا ما بقاوش غير مع الصحافة دازو حتى عند اللي محسوبين علي المؤثرين.

الدولة فالحقيقة هي المسؤولة. وزير الصحة خاصو يتحاسب. حنا فحالة طوارئ صحية. دول العالم كلو الغربي الليبرالي تكلفات بمعالجة كورونا. حنا شي وقت ولى اي مصاب يمشي دوز 14 يوم واكل شارب ودابا باش طلعات الارقام طاح النظام الصحي. ما بقاوش لفلوس وتخلات وزارة الصحة على مهامها. علاش ما ريكيزيونات كاع لكلينيكات. عوض هاد الشي عطاتهم رخص باش يستقبلو المرضى. راها حالة حرب هادي. تاخد جميع لكلينيكات من عند ماليها وتخدمهم بالسيف عليهم حتى نخرجو كلنا من هاد الحرب.

ديك النهار جا كيكذب رئيس جمعية لكلينيكات على الثمن. شهادات كتكذب كلشي اللي كيقولو. شهادات مرضى ل”كود” كيقولو باللي كانو فغرف فكلينيكات فيها اصلاحات. ما عندهاش حتى طواليط. ما كيشوفوش الاطباء والفراملية غير وقت الدوا. باللي كاع ديك الهدرة اللي قالها داك المسؤول كذوب. مريض سابق قال “كود” “بغاو يحيدو من يدي الدم النهار الاول. جابو وحدة موحالش واش فرملية. 17 دقيقة وهي كتقلب على العرق. ها اليد ليمنى ها الليد الليسرى. عاود تاني رجع لليمنا ودوز عاود ثاني لليسرى. 17 دقيقة باش تاخد لي بريليفمون كدار فاقل من 50 ثانية” يتذكر بالم.

دابا كيفاش الدولة تقدر تواجه هاد المافيا. كيفاش الدولة فشلات فامتحانها ضد هاد المافيا. كيفاش شي كلينيكات فوق الدولة وفوق القانون. شفنا فمراكش باش كان انهيار تام للقطاع كان كلينيك خدام وما قدر حتى حد يقرب منو حقاش عندو شركاء واصلين بزاف.

ضيعنا فرصة باش تبين الدولة باللي هي اقوى. باش توقف مافيات كثيرة منها مافيا الصحة.

موضوعات أخرى

17/01/2021 09:00

ياك نفس القضاء واش النيابة العامة كتبدل على حساب الشخص؟ فين الاجتهاد القضائي ففيديو السكيرج علاش ما طبقوهش فقضية بنت تطوان؟