الرئيسية > آش واقع > مافيات تنظيم اللقاءات لكبيرة كيضاربو على صفقة مؤتمر دولي للسياحة بمراكش. ابيدزار ما خداتش المشروع كتهاجم الوزارة وكتورط كلشي وهي ديما مستافدة من صفقات الداخلية واللي خداها حتى هو عندو امو فالعرس
15/06/2021 08:00 آش واقع

مافيات تنظيم اللقاءات لكبيرة كيضاربو على صفقة مؤتمر دولي للسياحة بمراكش. ابيدزار ما خداتش المشروع كتهاجم الوزارة وكتورط كلشي وهي ديما مستافدة من صفقات الداخلية واللي خداها حتى هو عندو امو فالعرس

مافيات تنظيم اللقاءات لكبيرة كيضاربو على صفقة مؤتمر دولي للسياحة بمراكش. ابيدزار ما خداتش المشروع كتهاجم الوزارة وكتورط كلشي وهي ديما مستافدة من صفقات الداخلية واللي خداها حتى هو عندو امو فالعرس

كود هناء ابو علي ///

البارح تحط ملف تنظيم الدورة 24 للجمعية العامة للمنظمة الدولية للسياحة بمراكش على وزيرة السياحة والنقل الجوي نادية فتاح. هاد التنظيم تكلفات فيه الشركة المغربية للهندسة السياحية التابعة للوزارة. فيه ان هاد المشروع اللي تحددات صفقتو فطلبات العروض ما بين 36 و50 مليون درهم٬ وفاللخر بقات فالمنافسة جوج شركات. قالو اللولى مجهولة والثانية ديال شي حوت كبير فهاد العالم اسمو لزرق مول “كابيتال ايفنت”

دابا ناضت شركات فشلات تفوز بالصفقة وفمقدمتها “اڤان سان” ديال مريم ابيدزير كتقول باللي اللي بقى فالسباق النهائي جوج شركات وباللي دارو عرض واصل 56 مليون درهم اي فايت 6 مليون الدرهم الصفق اللي تحدد فطلبات العروض.

اولا حتى واحد من هادو ما هامو المال العام. هاماه ميمي وصافي. عومار. هاد “اڤان سين” محتاكرة تنظيم شي انشطة قبل ما تجي “كورونا”. انشطة وزارة الداخلية كانت تخصص ديالها. انها دافع على المال العام فهادا مستحيل. انها تطلق حملة ضد هاد النشاط٬ طبعا ديرها.

نرجعو لشركة عادل لزرق اللي ممكن ياخد الصفقة. حتى هو ما هامو غير يجمع لفلوس. المشكل اللي خلق فشركتو انها كتخدم مع وزارة الصناعة والتجارة وباش خدمات مع وزارة السياحة ممكن تطرح اسئلة. واخا الوزيرة نادية فتاح ما فراسها. حقاش هادا خدم بزاف مع وزير الصناعة مولاي حفيظ العلمي وبحكم ان الوزير والوزيرة فتاح من نفس الحزب وكانو خدامين مع بعضهم٬ كيوقع الحرج. هاد الشي اللي ما قادراش تقولو ابيدزير او الناس اللي كلفاتهم يدافعو عليها ويسوقو ليها هاد الشي فالاعلام.

ايلي كان شي شفرة او خلل فالاختيار راه كيعطيهم قوانين الصفقات العمومية الامكانية يطعنو. هادو ما باغيين يطعنو. باغيين ينوضو النحل ويخليو وحدين خراين ياكلو الثومة بفمهم.

راهم كلهم تريكة وحدة. اخر همهم فلوس المال العام

موضوعات أخرى

01/08/2021 22:30

أمانة البي جي دي تالفا.. مقدروش يوافقو على ترشيح بنكيران وحطو امكراز ضدا فالقواعد بتيزنيت والشوباني اللي محارب مع الداخلية حطوه فميدلت باش يواجه الاحرار

01/08/2021 20:00

بعدما لقاو اقدم انسان عاقل ف المغرب.. الباحث ف علم الآثار عبد الرحيم محب: هاد الاكتشاف كيموقع المغرب كمنطقة أساسية ف شمال إفريقيا لدراسة السكان الأوائل