عفراء علوي محمدي- كود//

تصرف “خبيث” و”حقير” و”مافيهش كَرام ديال الروح الرياضية”، هكذا علقو متابعين كثار بعدما تبارطاجا فيديو صادم للعداء الفرنسي، التونسي الأصل، مرهاد حمدوني، وهو كيطيح قراعي الما بلعاني على الأرض باش يمنع المتسابقين من الشرب، خلال ماراتون بأولمبياد طوكيو 2020.

وكيبان فالفيديو حمدوني طالق يديه وكَالس كيطيح كَاع القراعي ديال الما، اللي حطاتهم اللجنة المنظمة فوق طبلة على جنب مضمار السباق، باش كل واحد ياخد قرعة إلى جاه العطش، قبل مايجي العداء الفرنسي ويريب كلشي.

نشطاء كثار عبرو على الغضب ديالهم من هذ التصرف اللي دار هذ العداء، واللي كيبان دارو عمدا وماشي عن غير قصد،  باش العدائين اللي معاه مايقاو مايشربو ويعياو دغيا.

وواخا هكذاك، مادار حمدوني والو فهذ السباق، وجا فالمركز 17، بينما فاز  الكيني إيليود كيبتشوغي بالذهبية، والهولندي عبدي ناجيي خدا الفضية، ثم البلجيكي بشير عبدي حصل على المركز الثالث ودا الميدالية البرونزية.

وحمدوني كيتعتبر بطل أوروبا الحالي لمسافة أكثر من 10000 متر.