الرئيسية > آش واقع > ماشي گاع لمغاربة محتاجين رخصة استثنائية باش يسافرو برا. اللي دار الڤاكسان معفي يخرج من هنا
24/06/2021 14:30 آش واقع

ماشي گاع لمغاربة محتاجين رخصة استثنائية باش يسافرو برا. اللي دار الڤاكسان معفي يخرج من هنا

ماشي گاع لمغاربة محتاجين رخصة استثنائية باش يسافرو برا. اللي دار الڤاكسان معفي يخرج من هنا

هناء ابو علي كود كازا ///

قال مصدر ل”كود” من الخطوط الملكية المغربية باللي گاع لمغاربة يقدرو يسافرو لبرا بشرط واحد هو دايرين الجلبة. اي اللي داير الڤاكسان ما محتاج لا رخصة استثنائية لا غيرها.

هاد الشي اللي كيهم الجانب المغربي. يعني عندك باسبور ديال الڤاكسان يمكن ليك تخرج. ما عندكش سير قلب على هاديك الرخصة.

بالنسبة للطرف لاخر اي الدولة اللي غادي تمشي ليها٬ هاديك شروط اخرى. مثلا ايلى بغيتي تمشي تركيا٬ قطع التذكرة وطير. ما كاين لا ڤيزا والدولتين بجوج يالله دارو اتفاقية كل وحدة كتعتارف بڤاكسان الدولة لخرى. حنا عندنا “استراسنيكا وسينوفارم” يمكن لاي واحد داير شي ڤاكسان منهم يدخل تركيا.

فاوربا وخاصة ففضاء شينگن٬ خاص يكون عندك الڤيزا هادي بلا ما نهدرو عليها٬ ولكن كاين اختلاف بين الدول. اسبانيا مثلا يدخلو ليها لمغاربة اللي دايرين استرازنيكا او سينوفارم بشرط قبل 14 اليوم من سفرك. اي بغيتي تمشي نهار 14 يوليوز خاص تكون الدوز الثانية دايرها نهار 01 يوليوز او قبل. وباش تكون مسافر تعمر واحد الوثيقة. بالنسبة لفرانسا ما معتارفاش ب”سينوفارم”٬ واخا تكون داير هاد النوع من الڤاكسان لابد من “بي سي ار” ولكن ايلى كنتي داگ “استراسنيكا” ما محتاجش.

شي دول كيديرو الحجر فدارك واخا عندك الباسبور سانيتير.

المهم هو ان لمغاربة اللي عندهم هاد الباسبور ما بقاوش محتاجين ديك الورقة ديال العمالة باش يخرجو من لبلاد. خاصك غير تعرف شروط دخول لبلاد اللي قاصدها وصافي.

موضوعات أخرى

27/07/2021 21:30

شيافر الطاكسيات فمكناس كاعيين بسباب قرار جوج بلايص.. وشيفور لـ”كود”: مكرفصين ومتضررين ماديا ومول الطاكسي مايعقلش عليك وغيبغي روسيطتو كاملة