كود – وكالات //

طالبان خرجات بقانون جديد فـأفغانستان كيخلّي الراجل يضرب مرتو وولادو “قانونياً”، بشرط ما يهرسش العظم وما يفلحش اللحم ، هاد العنف سماوه “تعزير” ومكيتعتبرش جريمة جنائية، والقانون موقّعو زعيم الحركة هبة الله أخوندزاد وتوزّع على جميع المحاكم.

اما إلى المرأة هربات لدار والديها بلا إذن الزوج، وخا تكون هاربة من العنف، كتدخل للحبس حتى 3 شهور، ويلا سكناتها شي فاميلة  كتعاقب حتى هي ، اما إلا كان العنف خطير العقوبة القصوى غير 15 يوم حبس للراجل، وزيد عليها صعوبة الشكاية حيث خاصها تمثل قدّام قاضي راجل ومْحجّبة و وليّ أمر، وغالباً كيكون هو نفس الزوج المعتدي.

القانون الجديد حيد بزاف ديال القوانين القديمة اللي كانت كتجرّم الزواج القسري والاغتصاب والعنف ضد العيالات ، وزادو  جرّمو حتى أي انتقاد لقيادة طالبان أو قراراتها بعقوبات كتوصل حتى لعامين حبس ولا الجلد مع الحبس وحتى الرقص والموسيقى ولاو محرّمين، واللي يرقص ولا يشوف الرقص كيتعاقب شهرين حبس.

الأمم المتحدة عبرات على القلق ديالها، وعلى لسان المقررة الخاصة ريم السالم اللي قالت باللي هاد القوانين كارثية على النساء والبنات ،ومني رجعات طالبان للحكم فـ 2021، العيالات  خسرو بزاف من حقوقهم وولات حياتهم محضية ومزيرة .