كود -وكالات////

إلا كنتي من دوك اللي كيباتوا الليل كامل وهوما كيشيرو على شنيولة، وصاحبك ناعس حداك هانية عندو ما كيقرب ليه حد، عرف راسك ماشي مسخوط وإنما العلم لقى الدوا لهاد اللغز! دراسة جديدة  بيّنات باللي السر كامل مخبع فواحد الزيوت والشحوم كيفرزها الجلد ديالك، وهي اللي كتعطي لناموس “الإشارة” باش تختارك .

الباحثين جابوا 60 واحد، لبسوهم تقاشر ديال النالون فاليدين لستة السوايع باش تلصق فيهم ريحة الجلد، من بعد، طلقوا عليهم “شنيولة وخلاوها تختار. الصدمة كانت كبيرة، كاينين شي ناس الناموس طار عليهم أكثر من لخرين بـ100 مرة!

التحاليل بيّنات أن هاد “المغناطيس ديال الناموس” عندهم تركيزات عالية ديال واحد الأحماض دهنية فوق الجلد، يعني شنيولة ماشي كيكره لخرين، غير هادوك لخرين ما فيهمش الريحة اللي كتشهي.

ولكن البلان ماشي غي فهاد الدهون بوحدها، ملي طاقوس ناموس معدل وراثياً ما كيشمش هاد الأحماض، بقى عاوتاني كيمشي لنفس الأشخاص. هادشي كيعني باللي كاينين عوامل خرى بحال ثاني أكسيد الكربون اللي كتخرجو من فمك ملي كتنفس، وحمض اللاكتيك اللي كيكون فالعرق.

الحلو فهادشي كامل، هو أن العلماء كيعتقدوا باللي البكتيريا اللي عايشة فوق جلدنا (الميكروبيوتا) هي اللي كتاكل هاد الدهون وتخرج هاد الروائح، وفالمستقبل، كيفكرو يبدلو هاد الميكروبيوتا باش بنادم يولي “مخزون” على الرادار ديال الناموس!