كود-وكالات//

باحثين راجعو كثر من 300 حالة موثقة فالعالم، ديال التبني، ولقاو باللي بزاف ديال الرئيسيات، بحال القرودة، كيديرو علاقات اجتماعية مع حيوانات من أنواع مختلفة، الشي لي كيطرح سؤال كبير، واش هاد السلوكات هي الأصل التطوري اللي خرجات منو علاقة الإنسان بحيواناتو الأليفة؟

الدراسة، اللي تنشرات فمجلة Primates، حللات 303 حالات علمية، و58 صورة وفيديو، وزادت عليهم آراء 66 خبير فالرئيسيات، الباحثين بغاو يعرفو شكون أكثر قابلية يبني هاد العلاقات، واش مع أنواع القريبة مع بعضياتها، واش الإناث كيرعاو حيوانات من أنواع أخرى أكثر من الذكور، وواش الصغار كيلعبو مع الحيوانات كثر من الكبار.

ومن أغرب الأمثلة اللي توثقات، قرد جيبون كيشد فأر بين يديه، وقرد لانغور كيلعب مع سنجاب كبير، وحتى حالات أخرى غريبة بحال تفاعل قرود المكاك اليابانية مع غزلان السيكا، الباحثين كيأكدو أن هاد الظاهرة كتبين أن البشر ماشي بوحدهم اللي كيبنيو علاقات مع أنواع أخرى.

النتائج بينات أن الرئيسيات كيتفاعلو كثر مع أنواع قريبة ليهم تطورياً، حيث التواصل بيناتهم سهل، كما لقاو أن الإناث البالغات أكثر ميلاً لتنظيف ورعاية حيوانات من أنواع أخرى، بينما الصغار كيميلو أكثر للعب معها.

الدراسة استحضرات حتى حالة نادرة توثقات عام 2020، ملي لبوة آسيوية تبنات نمر صغير، وخا أن السبوعا والنمورا كيتنافسو على نفس الموارد، الباحثين كيشوفو أن هاد السلوك كيببن أن غريزة الرعاية عند بعض الحيوانات قوية بزاف، لدرجة أنها تقدر تشمل حتى صغار ما عندهم حتى علاقة قرابة بيها.

وحسب الباحثين، هاد السلوكات هي نفسها لي خلات البشر يربيو الحيوانات ويطورو معاها علاقات قوية.