كود -وكالات //
تباعو جزء من الدروج الأصليين ديال برج إيفل فمزاد علني بثمن قياسي وصل لـ450 ألف و160 يورو، حسب ما علنات دار المزادات Artcurial ،هاد القطعة كتتكوّن من 14 لدرجة والعلو ديال لـ2.75 متر، لي كانو جزء من الدرج الحلزوني الأصلي ديال “السيدة الحديدية” اللي تبنات ف 1889، لي كان كيربط بين الطابق الثاني والثالث فالبرج الشهير.
هاد الجزء كان تابع لمجموعة خاصة وبقى عند ماليه كثر من 40 عام، وكان متوقع يتباع بين 120 ألف و150 ألف يورو،و لكن الثمن النهائي فات التوقعات بزاف.
وماشي هادي أول مرة كيتباع أجزاء من دروج برج إيفل بأثمان كبيرة، حيث فـ2016 تباع جزء آخر ب 523 ألف و800 يورو، أمة الرقم القياسي تسجل فـ2008 فدار مزادات Sotheby’s، ملي خلّص مشتري أمريكي كثر من 552 ألف يورو باش ياخدو.
وكترجع قصة هاد الدروج لعام 1983، ملي تقرر يتركب سانسور بين الطوابق العليا ديال البرج، ووقتها تفكك الدرج الأصلي وتقطع لـ24 جزء مختلف ،وكتقول دار أرتكوريال بلّي عدد قليل فقط من هاد القطع بقا ففرنسا، أما أجزاء أخرى مشات لبلايص معروفة فالعالم، من بينها حدائق مؤسسة يويشي فاليابان، ومنطقة قريبة من تمثال الحرية، وحتى ديزني لاند، أما الباقي كاين فمجموعات خاصة.
وكيُتعتبر برج إيفل من أشهر المعالم السياحية فالعالم، بطول كيوصل لـ324 متر، وبناه المهندس غوستاف إيفل بمناسبة المعرض العالمي اللي تنظّم فباريس سنة 1889.