كود – وكالات //

لمّح الملياردير الأمريكي إيلون ماسك انه يقدر يشري  شركة الطيران  “رايان إير”، بعدما دار سونداج رأي على منصة “إكس” اللي ديالو، وسول فيها المتابعين واش ياخد الشركة مزيانة ،هاد التلميح جا مع خلاف  بين ماسك والمدير التنفيذي ديال رايان إير مايكل أوليري، بسبب رفض الشركة تعتمد على  خدمة الأنترنت الفضائي “ستارلينك”  فطياراتها.

المخصامة تزادت من بعد تصريحات لأوليري فمقابلة إذاعية، أكد فيها أن تركيب معدات ستارلينك غادي يكلف الشركة  مئات ملايين الدولارات كل عام ، بسباب مقاومة الهواء  وكونسوماسيون د الكيروزين، وزاد قال بللي زبناء رايان إير ما مستعدينش يخلصو على الأنترنت فالسما، أوليري ما حبّسش عند هاد الحد، وهاجم ماسك بشكل مباشر، واعتبرو  ما كيفهم والو   فعالم الطيران.

وخا هاد المخاصمة،  إيلون ماسك لمح لإمكانية باش يشري رايان إير، لي واصلة    قيمتها السوقية تال 30 مليار يورو، ولكن   القوانين الأوروبية كتفرض تكون أغلبية الأسهم بيد مستثمرين أوروبيين ،كيجي هاد النقاش فوقت كتوجد فيه شركة سبايس إكس لأكبر اكتتاب عام أولي فالتاريخ عام 2026، باش تجمع تمويلات كملات باش توسع  مشاريعها، وعلى راسها شبكة “ستارلينك” اللي بدات فعلاً كتدخل بجهد لقطاع الطيران العالمي.