اسماء غربي – كود//

بفضل منصة X ديال ايلون ماسك والخاصية الجديدة  “Country Label”، اللي كتمكّن من تعرف منين كيتسير أي حساب ولمن تابع، ولات عندنا اليوم صورة واضحة على المصدر الحقيقي ديال التعليمات اللي كيتلقاوها مؤطّري حركة الاحتجاج ديال “Gen Z” فبلادنا. وفرضية التدخلات الأجنبية ولات كتأكد بشكل علني وواضح.

التحليل ديال مجموعة من الحسابات بيّن بالملموس باللي النداءات ديال التحريض على الفوضى وزعزعة الاستقرار كانت كاتجي بالأساس من الجزائر، وقطر. وتبيّن أنّ هاد الحسابات كتركّز على نشر خطاب عدائي ومعادي للمغرب، وكتستهدف بشكل مباشر المغربية ديال الصحرا وحاولات التشكيك فيها بشكل منظّم.

الجزائر مفهومة، بلاد مكتحملش بلادنا، وباغا تضرنا وتضر مصاليحنا. “الصدمة” هي قطر! قطر زعما بلاد صديق د المغرب ومع مصالحه ومغربية صحرائه ومع استقراره…

اللي مامفهومش كثر من تدخل قطر هو السكات د خارجيتنا! كيفاش مازال ماقالت والو على هادشي؟ كيفاش حليف بحال قطر اطاكا المغرب واستقرارو وبوريطة مازال ماهضر ماتحرك ماوالو؟

المهم هاد الخاصية الجديدة اللي وفّرتها منصة X ساعدات على كشف المصدر الحقيقي ديال هاد الحسابات، فوقت كان فيه المسؤولين على هاد الحركة كينكرو لعدة أيام وكيقولو باللي هاد الحسابات مغربية وكتشتغل من داخل المغرب.