سهام البارودي كود//
شي أمهات كايصحابهم راه غير لا وكلات ولادها وشرباتهم وكساتهم راه صافي أدّات الواجب لي عليها، كايصحابهم الحياة هي الخبز والكاشير واللانش بوكس والطابليط وديه المدرسة ودير ليه الطرونسبور، بزاف ديال الأمهات والواليدين بصفة عامّة ماواجدينش نفسيا وعقليا باش يكونو آباء، يصحابهم التربية ساهلة، أغلبهم جاو من أسر فقيرة ومقودة عليها وكايصحابهم راه غير لاوفرو الماكلة والشراب والكسوة لولادهم راه ضربوها للعين العورة، مافاهمينش أصلا شنو هي الأمومة والأبوة والمسؤولية الجسيمة لي كاتفرضها عليك، كايتجوجو وكايولدو واحد وجوج وثلاتة د الأطفال يتكرفصو عليهم ويمرمدوهم ويصنعو منهم راشدين غير أسوياء ولي تاهوما بدورهم كايتجوجو ويفرخوا عاهات ومرضى نفسيين اكثر منهم وكاتبقى الدولة تغرق وسط أجيال د المرضى والعاهات عام على عام.
شي حمقات كايدافعو على هيام سطار من نيتهم، السيدة مريضة نفسيا مفوتية كون تصرفها فشي بلاد اخرى فحال السويد ولا النرويج تعطيك نزيلة فمستشفى د الأمراض العقلية سادين عليها فشي بيت ومضوبلين الحيط بالفرشي باش تا لازدحات راسها مايسيلش الدم، ماشي أم لربعة د الأبناء كاتمارس عليهم جميع أنواع العنف النفسي والجسدي وهاكاك عندها ليفان وعشاق ومدافعين لي تبعوها تال المحكمة وبكاو فاش قالت للقاضي “واش كاينة شي جمعية كاتحيد الولاد لمهم”، هادوك نفسهم لي كاتلقاهم فالتعليقات كايقوليك “واش كاين شي واحد غايبغي دوك الدراري احسن من مهم؟” معلوم يا الحمقة يا بنت الحمقة كاين لي غايبغيهم وغايحن عليهم و غايعاملهم احسن من مهم، واش غي لي خصبات شي بويضة وولدات صافي كاتولي “أم” وتقدر دير مابغات فالدراري؟ واش غير لي حملات وولدات فحالي كاتحمل البقرة والقطة والكلبة وولدات كايتزادها شي گراد وكاتولي إنسانة سوية تقدر تربي أطفال وتوفر ليهم الرعاية النفسية والجسدية لي خاصاهم باش يكبرو فمناخ سوي !
آ باراكا! باراكا من هاد التقديس الخاوي لكلمة “أم” راه المغرب عامر بالأمهات الحمقات والمريضات نفسيا والمعقدات والمجرمات لي كايتكرفصو على ولادهم باسم “الأمومة” والرضى والجنة تحت إقدام الأمهات! باراكا على المغرب عامر ببزاف ديال الأمهات لي مايستاهلوش يربّيو تا هامستر فالدار فما بالك بطفل/ إنسان محتاج للرعاية الكافية والوقت والطاقة والجهد والخاطر ومحتاج لأب وأم أسوياء يكونو معاه.
ولاد هيام أحسن حاجة طرات ليهم هي يبعدوا منها، الله على راحة دابا عاد غاينعسو فالوقت ويفيقو فالوقت ويقراو فالوقت وياكلو فالوقت ويعيشو حياة كريمة بعيدا عن الصداع والغوات والهيستيرية والحماق والضرب والسبان ديال مّهم وراجل مّهم.
