كريم الشركي – كود //

السياسة عند المغاربة، مامتعلقاش بمفهوم السياسة، ولكنها مخلطة مع الانتماء العائلي وزيد عليها العصبية القبلية وثقافة البيئة المحيطة اللي عامرة خرايف و خزعبلات، وهادشي كيبان فالتصويت يوم الانتخابات وفمناصرة المرشح اللي عندو نفس هوية الناخب أو قبيلته وهلم جرا.

وفعين حرودة، كتزيد تتأكد نظرية أن السياسة فالمغرب نموذج استثنائي، القضية بدات بعدما تم الطعن فأحد المرشحين الفائزين فانتخابات عين حرودة، وذلك لأنه كان فحزب ومشا لحزب اخور.

https://www.facebook.com/100036422046381/posts/562184225005641/

السيد قرر أنه يرد على الطعن، بـ”طعن خرافي”، كايبين حالة و طبيعة بحال هاد النوع من المنتخبين اللي معششة فيهم الخرافة، و اللي هدفهم أصلا هو “يربحو” الانتخابات بأي وجه كان وخا يكون كيخالف القانون.. مشا قدم “الطعن الخرافي” ديالو فالزاوية ودار زيارة للوالي وبدا كيدعي وكيتصور وكيبارطاجي فـ الفايسبوك (شوفوني راني كندعي وكنطلب الولي الصاليح)، محاولا أن يتغلب على قضاة المحكمة الإدارية بـ “بركة الولي المجدوب”.