كود سبور//

واخا الوداد ربحو الكلاسيكو البارح السبت، بنتيجة 2 لواحد برسم الدورة 28 من البطولة الاحترافية، وقربو من ليفار اللي محتلين المركز الثاني وولى الفارق معهم 3 نقاط، راه كايبان بلي التسيير فالفريق الأحمر غادي بعشوائية، وهذا الرباح ما خاصوش ينسي الوداديين فالمشاكل التسييرية ديال الواك والكوارث اللي تسبب فيها الرئيس هشام آيت منا فأول موسم له مع الفريق.

الضبابية والمستقبل الغامض للوداد الرياضي، بانو تاني وهاذ المرة بشكل غير مباشر من كلام مساعد المدرب هشام بنهاشم، اللي واخا الفريق بان معه بشكل مختلف على المدرب رولاني موكوينا، ولكن من خلال التصريح ديالو بعد الماتش بان بلي حتى هو ما عارفش المستقبل ديالو مع الوداد، وواش غايخليه آيت منا يبقى يدرب الفريق ولا غايحيدو، وأكد الخبر اللي كان نشر جورنال “گود” بأنه غير مساعد مدرب دارو ايت منا مؤقتا حتى يسالي الموسم، وقال: “بالنسبة لكاس العالم باقي الحال، أنا دابا مدرب ديال الوداد الرياضي فهاد 3 مباريات، وعندي عقد ديال مساعد مدرب، كاس العالم مازال بعيد، ودابا حنا نساليو هاد الماتشات عاد نفكرو فكاس العالم”.

هذا التصريح ديال أمين بنهاشم كايعكس حاجة وحدة، وهي عدم الاستقرار وضبابية المستقل اللي وصل له الوداد مع الرئيس الحالي هشام ايت منا نتيجة العشوائية والارتجالية فالتسيير، حيث كيفاش كاس العالم للأندية مازال له شهر واحد ويبدا، والوداد ممثل المغرب اللي خاصو يبان بأحسن صورة حيث لاعب ضد أندية كبيرة وعالمية بحال مانشستر سيتي ويوفنتوس، مازال ما معروفش شكون المدرب اللي غايمشي معه لكأس العالم، وبنهاشم اللي مكلفو هشام ايت منا يدرب الفريق، كايقول إن المونديال مازال بعيد وحتى يسالي هاد 3 الماتشات عاد يفكرو فالمونديال، وزيد عليها من الفوق واش كاين شي مدرب محترم، كايقبل على راسو يضرب البريكولات، ويتحول من مدير رياضي فالوداد لمساعد مدرب باش يلعب 3 الماتشات وما عارفش شنو غايدير معه أيت منا واش غايخليه ولا يصيفطو بحالو.

للإشارة فالوداد الرياضي، جراو على مساعد المدرب رولاني موكوينا باش يكونفوكيو أمين بنهاشم كمدرب مساعد فالوداد عند العصبة الاحترافية، حيث ما يقدروش يديروه بنهاشم مدرب حيث موكوينا مازال هو المدرب بالعقد اللي عندو مع الفريق وعند العصبة الاحترافية، وهذا الشي كامل حيث ايت منا ما قادرش يعطي مليار لموكوينا قيمة الشرط الجزائري لفسخ العقد معه، وعطاه عطلة مشى خرج فيها من المغرب، ولكن المصيبة هي ان ايت منا جرا على مساعد موكوينا اللي الاخير هو اللي معينو وهذا الشي راه كايقوي موقف المدرب الجنوب افريقي إلى كان شي نزاع بين الطرفين، وكايبين سوء التسيير والعشوائية والارتجالية ديال ايت منا فالوداد.