كود -وكالات//

مارين لوبان نوضاتها قبل انتخابات الرئاسة الفرنسية 2027، مني علنات أنها باغية تدير استفتاء شعبي على منع الحجاب فالأماكن العامة.

الحزب ديالها قال إنه فرض حتى غرامات على العيالات المحجبات، فمقترح فتح واحد من أكثر الملفات حساسية ففرنسا.

لوبان قالت فحسابها فـ«إكس» بلي، فحالة فوز حزب التجمع الوطني بالانتخابات الرئاسية، غادي تعرض على الفرنسيين قانون كبير لمحاربة «الإيديولوجيات الإسلامية»، ولي غادي يكون من بين الإجراءات ديالو تجريم ارتداء الحجاب الإسلامي فالمجال العام.

هاد الموقف ماشي جديد على لوبان، اللي سبق ليها دافعت على منع الحجاب فالحملات الانتخابية الرئاسية ديالها فـ2012 و2017 و2022. ولكن هاد المرة رجع المقترح بقوة، خصوصاً مع اقتراب الانتخابات المقررة فربيع 2027.

وقبل تصريحات لوبان، النائب عن حزب التجمع الوطني جان فيليب تانغي كان كال إن الحزب، فحالة وصل للسلطة، غادي «يعاقب على لباس الحجاب»، ويفرض غرامة مالية على العيالات اللي غادي يبقاو لابسينو وخا المنع، كيف ما قارن هاد الغرامة بالعقوبات اللي كيتعرض ليها السائق اللي ما كيلبسش حزام السلامة، بلا ما يكشف على القيمة ديالها.

رئيس التجمع الوطني جوردان بارديلا قال إن الحزب ما باغيش يخلق «بوليس ديال الحوايج»، وإنما باغي يخلي الفرنسيين هما اللي يقررو عبر الاستفتاء.

بارديلا هضر على جوج استفتاءات إلا فاز الحزب بالرئاسة: واحد على الهجرة، والثاني على «الإيديولوجية الإسلامية». وقال بلي الحزب باغي يوسع حتى منع الرموز الدينية باش يشمل المدرسة والمجال العام.