كود -وكالات//

حكمات محكمة الاستئناف فباريس، اليوم الثلاثاء 7 يوليوز، على مارين لوبان، زعيمة حزب التجمع الوطني، بـ 3 سنين ديال الحبس، جوج منهم سورسي، وعام فالإقامة الجبرية وهي لابسة البراصلي الإلكتروني، وزادت المحكمة حكمات عليها بعدم الأهلية السياسية لمدة 45 شهر، 30 شهر منها موقوفة التنفيذ.

عملياً، لوبان غتلبس السوار الإلكتروني لمدة عام، ولكن هاد الحكم ما كيمنعهاش حالياً من الترشح للانتخابات الرئاسية المقبلة، حيث مدة عدم الأهلية الفعلية سالات، لوبان كانت صرحت قبل أيام أن أي مرشح للرئاسة خاصو يكون حر فالتنقل، وهو الشي اللي قالت باللي ما كيتوافقش مع السوار الإلكتروني.

الحكم الجديد جا خف من الحكم الابتدائي اللي خرج فمارس 2025، واللي كان كيقضي بأربع سنين ديال الحبس، جوج منهم نافذة، وخمس سنين ديال عدم الأهلية السياسية، وغرامة مالية واصلة لـ 100 ألف يورو.

القضية كتهم تشغيل مساعدين برلمانيين أوروبيين ما بين 2004 و2016، القضاء الفرنسي كيقول بلي هاد المستخدمين كانو كيتخلصو من ميزانية البرلمان الأوروبي، ولكن الخدمة ديالهم كانت غادية فمصلحة حزب الجبهة الوطنية، اللي ولى من بعد اسميتو حزب التجمع الوطني.

المحكمة اعتبرت الوقائع خطيرة بسبب طول المدة، وحجم الأموال اللي تم تحويلها، لكنها أشارت إلى أنه ما كانش أي إثراء شخصي مباشر لمارين لوبان.