گود سبور//

مازال كايحلمو ريال يرجعو الدولي المغربي أشرف حكيمي نجم باريس سان جرمان الفرنسي، لعندهم واخا العلاقة بيناتهم ما بقاتش هي هاديك بعدما قرر اللاعب المغربي يمشي بحالو قبل 5 سنين باش يقلب على راسو ويلعب ماتشات اكثر، وبالمقابل ريال مدريد ما تمسكوش به وخلاوه يمشي.

وكشفت جريدة “ماركا” الإسبانية، أن عدد من المسؤولين داخل ريال مدريد، كايعتبرو رحيل أشرف حكيمي عن الفريق عام 2020 كان غلط، وهذا الشي زاد أكدو المستوى ديالو العالمي مع باريس سان جرمان، وراه دابا كايفكرو يرجعوه.

نفس المصدر وضح أن النجم الفرنسي كيليان مبابي مهاجم ريال مدريد واللي هو صاحب أشرف حكيمي وعشيرو الروح بالروح، يقدر يلعب دور بين الطرفين ويقاد لهم اجتماع، مع العلم ان رحيل حكيمي على باريس سان جرمان صعيب بزاف، حيث مسيني معهم حتى لعام 2029.