كود سبور//

لعب الدولي المغربي أشرف حكيمي دور مهم باش عدد من اللاعبين المغاربة اللي عندهم دوبل ناسيوناليتي يلعبو مع المنتخب المغربي، ومن بينهم ابراهيم دياز نجم ريال مدريد الإسباني.

وكشفت جريدة “ماركا” الإسبانية، أن أشرف حكيمي نجم باريس سان جرمان الفرنسي فرش الطريق لعدد من اللاعبين الشباب باش يختارو بلد الجذور ديالهم، وأنه كان عندو دور باش يختار ابراهيم دياز يلعب فالمنتخب المغربي.

وتطرقت الجريدة الإسبانية، فمقال لها، لشبكة المنقبين المغاربة فأوروبا على المواهب اللي تقدر تلعب للمنتخب المغربي، واللي منتشرة فعدد من الدول الأوروبية وكيفاش كيربطو هاد المنقبين الاتصال مع عائلات اللاعبين وفوقت مبكر من عمر اللاعب، وهذا الشي تحت إشراف ربيع تاكاسا، واللي كاين فمدريد من 2014، وكان عندو دور مهم فحسم قرار مجموعة من المواهب اللعب للمغرب بحال أشرف حكيمي ومنير الحدادي وعبد الصمد الزلزولي ولاعبين اخرين.

وبالإضافة إلى هذا الشي، وضح نفس المصدر، أن الجامعة الملكية المغربية لكرة القدم، ما كتبخلش على استخدام الوسائل ديالها الدبلوماسية باش تعاون الناخب الوطني فإقناع المواهب المغربية، وحتى اللاعبين اللي كيلعبو دابا مع المنتخب المغربي كيعاونو بحال أشرف حكيمي، وكيديرو خدمة فالكواليس، وكيعيطو لصحابهم باش يفرشو لهم الطريق يلعبو مع المغرب، وراه كان حكيمي أول المهنئين لابراهيم دياز ملي عيط له الناخب الوطني وليد الركراكي وقالهم مرحبا بك فداركم، وإلى جانب هذا الشي، لعب إنجاز المنتخب المغربي تحت قيادة الركراكي فمونديال قطر 2022، عدور مهم فإقناع اللاعبين الشباب اللي عندهم طموحات وباغيين يحققو نجاحات.

وحسب جريدة “ماركا” الإسبانية فخدمة كبيرة كديرها الجامعة الملكية المغربية لكرة القدم، بالتنسيق مع المنقبين ديالها فأوروبا باش تضمن أن اللاعبين اللي عندهم دوبل ناسيوناليتي يلعبو مع المنتخب المغرب، ومن بينهم الثنائي الشاب ولد ريال مدريد يوسف لخديم وآدم أزنو ولد البارصا اللي كيلعب دابا مع بايرين ميونخ الألماني، اللي فايت لعبو مع الفئات الصغرى ديال منتخب إسبانيا بحال الشكل ديال أشرف حكيمي وابراهيم دياز ودابا اختارو يلعبو مع المغرب، وأن هذا الخدمة اللي كديرها الجامعة كيتم الإشراف عليها من أعلى مستوى، والمغاربة يبقى عندهم ارتباط بجذورهم المغربية واخا يتزادو فدول أخرى بحال إسبانيا وغيرها، وهذا الشي بالإضافة إلى الاستثمار فالرياضة وفالكرة، بحال الخدمة اللي كتدار سنوات دابا فأكاديمية محمد السادس لكرة القدم، واللي كانت ورا إنتاج عدد من اللاعبين اللي ساهمو فتحقيق المغرب لدومي فينال كوب ديموند بحال عز الدين أوناحي ونايف أكرد.