كود سبور//

كتعيش الكورة الإسبانية خوف كبير بسبب الوضع ديال اتحاد كرة القدم الإسباني، المهدد بعقوبات من طرف الاتحاد الأوروبي والدولي، وهذا الشي يقدر يشكل خطر على تنظيم إسبانيا لكأس العالم مع المغرب والبرتغال عام 2030.

وكشفت جريدة “ماركا” الإسبانية أن معاقبة إسبانيا من طرف الاتحاد الأوروبي والاتحاد الدولي بسبب تهم الفساد اللي غارق فيها اتحاد الكرة الإسباني وتدخل الحكومة فالشؤون ديالو، ماشي تهديدا وصافي، ولكن راه حقيقة وأن الاتحاد الأوروبي والاتحاد الدولي كيدرسو معاقبة إسبانيا بمنع منتخبها من المشاركة فكأس أوروبا الصيف الجاي ومنع الأندية الإسبانية من المشاركة فالمسابقات الأوروبية خلال المرحلة المقبلة.

وحسب نفس المصدر، فالعقوبات راه ممكن يصادق عليها من طرف الاتحاد الأوروبي والاتحاد الدولي خلال الكونگريس الجاي ديال الفيفا فشهر ماي المقبل، والمشكل الكبير هو أن العقوبات تقدر توصل إلى منع إسبانيا من المشاركة فالتنظيم المشترك مع المغرب والبرتغال لتنظيم مونديال 2030.