كود سبور//

بدا الدولي المغربي ابراهيم دياز كياخد حقو فاللعب والاعتراف مع ريال مدريد الإسباني، وهذا الشي تأكد اليوم الاحد خلال ماتش الفريق ضد خيتافي فسانتياگو برنابيو برسم الجولة 15 من بطولة الصبليون اللي ربحوه بنتيجة 2 لزيرو.

وتطرقت جريدة “ماركا” الإسبانية للأهمية ديال ابراهيم دياز فريال مدريد والأدوار اللي كايلعبها مع الفريق، ووضحت أن النجم المغربي اللي خدا الرسمية ديالو مؤخرا، لعب أساسي ضد خيتافي ولعلبو المدرب كارلو انشيلوتي فثلاثة ديال البوسطات مختالفين تكلف بهم خلال هذه المباراة بوحدها.

وبدا ابراهيم دياز الماتش كمهاجم جناح أيمن، وبعدما خرج بيلينگهام انتقل لوسط التيران لعب فيه، وملي خرج رودريگو، لعب راس حربة وهمي، وهذا الشي كايخليه لاعب جوكر بالنسبة للفريق.

وأكدت الجريدة الإسبانية، أن ابراهيم دياز ولى لاعب أساسي بالنسبة لريال مدريد ومعول عليه كارلو أنشيلوتي، وفينما حطو كايقضي له الغرض وبنجاح، وهو لاعب حيوي حيث المهارات ديالو متعددة، وهو مهم بزاف وخصوصا وقت الاصابات اللي كاتكون عند ريال مدريد بحال كيفما واقع دابا.