كود سبور//

باغيين أولمبيك مارسيليا الفرنسي اللي المدير الرياضي ديالهم هو المغربي مهدي بنعطية، (باغيين) يسنيو مع الدولي المغربي نايف أگرد المدافع المعار من ويستهام النگليزي إلى ريال سوسيداد الإسباني.

وحسب موقع “فوت ميركاتو” الفرنسي، فأولمبيك مارسليا واحد من الأندية الأوروبية المتنافسة على خدمات نايف أگرد فهاد الميركاتو الصيفي الجاي، وأنهم باغيين يدعمو صفوفهم حيث لاعبين دوري أبطال أوروبا الموسم الجاي.

ووضح نفس المصدر أن البروفايل ديال الدولي المغربي نايف أكرد مميز بالنسبة لأولمبيك مارسليا، خصوصا وأنه كايعرف مزيان كرة القدم الفرنسية، حيث فايت لعب مع ديجون وستاد رين الفرنسيين.

واشار الموقع الفرنسي إلى ان أولمبيك مارسليا اللي كايعتبرو نايف أگرد أولوية بالنسبة لهم دابا، خاصهم ينافسو عدد من الاندية الأوروبية، باش يربحو الخدمات ديالو، وخصوصا الاندية الالمانية بحال بحال باير ليفكوزن، وحتى الأندية الإسبانية بحال اتليتيكو مدريد اللي مازال باغيين يسنيو معه ومن العام اللي فات وهما باغيينو، وريال سوسيداد اللي متشبثين باش يبقى معهم، وهذا الشي غايخلي الصراع قوي على خدمات المدافع المغربي مول 29 عام، وقال الموقع الفرنسي ان اولمبيك مارسليا خاصهم يتقاتلو إلى بغاو يسنيو مع نايف أگرد.