محمد سقراط-كود///

ماذا لو كانت راية السعودية هي لي تحرقات قدام البرلمان، شي مواطن معجبوش التدخل العسكري السعودي في اليمن وحتى هو ناض يدير بحال صحاب وايحمان ويحرق الراية قبالة البرلمان،ماذا لو كانت راية تركيا أو صورة أردوغان شي واحد معاجبوش التدخل التركي في سوريا أو في حق الأكراد، أو ماذا لو كانت راية جمهورية الصين الشعبية شي مواطن معجبوش تعريف الصين للإسلام كمرض عقلي وخاصو علاج وهادشي علاش كتجمع مسلمي الإيغور في مراكز التدريب المهني، أو الراية الجزائرية شي مواطن معجبوش إعتقال الجزائر لبوعلام صلصال وناض حرق الراية، وماذا لو كانت راية فرنسا كاين ألف سبب لحرق رايتها في اشوارع أولها الإقصاء على يد منتخبها في كاس العالم، مثلا في داك الليلة وبنادم كاعي وغضبان وحاس بالحكرة، ومن بعد كان كيحلم غير يدوز للدور التاني لقى راسوا كيحس بالغبينة وكأن كأس العالم سرقت من بين يده وينوضوا يشعلوا العافية في راية فرنسا.

أو راية ميريكان لي حتلات جوج بلدان إسلامية وقتلات الملايين وفي نفس الوقت هي لي عتارفات لينا بالصحراء، واش كان يكون حرق راية أعظم أمبراطورية في التاريخ حاجة عادية، ماذا لو كانت راية قطر شي واحد ماعاجبوش الخط التحريري ديال الجزيرة، ماذا لو كانت راية كوبا لي دربات أشبال البوليزاريو وطلقاتهم علينا، ماذا لو كانت راية إسبانيا لي باقا مستعمرة جزر ومدن مغربية، ماذا لو كانت راية سوريا الجديدة بزاف ديال المغاربة ضد جرائم النظام السوري الجديد في حق العلويين، ماذا لو كانت راية داعش أو النصرة أو أي جماعة إسلامية إرهابية، ماذا لو كانت عشرات الدول الصديقة في العالم ولكن غادي تلقى كاين مغربي محاملهاش، واش غير لي محاملش شي بلاد ينوض يحرق رايتها، واش راها سايبة حتى لهاد الدرجة.

خاص الدولة تتدخل وتمنع حرق أي راية ديال أي دولة في المغرب، مايمكنش يكون المغرب ساحة لبث مشاعر الكره والحقد والعدوانية إتجاه دول صديقة أو غير صديقة، حرق علم أي بلاد هو تحريض ونداء لممارسة العنف إتجاه هاد البلد ورموزه وقد يمتد هاد العنف حتى لمواطنيه، بحال هاد السلوكات هي لي خلات هاداك الشاب المغرر به ولد زاكورة عوض يشد الطيارة باش يشوف واليديه شدها باش يجاهد فليهود، ماسمعش نصيحة الهناوات الله يرحمهم على شكون يقد على ليهود آسي، راه الصراحة معندها معنى تحرق راية دولة صديقة كتعاونا على تطوير البلاد من عدة نواحي وخصوصا العسكرية منها، كيف كتشوفوا نجاعة الدرونات الإسرائيلية في تصيد الحمساويين، راه نقدرو حتى حنا تولي عندنا نفس النجاعة في تصيد مقاتليلا البوليزاريو ونفرقوا بينهم وبين المغاربة المحتجزين في تيندوف، نتمناو من وهبي راه هو من العقلاء القلائل في هاد البلاد ليب عارف أين يوجد صلاحها، نتمناو يجيب شي قانون يمنع حرق أعلام الدول وعلاش لا حتى شي قانون ديال معاداة السامية ديال ما بعد الحرب العالمية التانية مباشرة.