كود -وكالات//

فعام 2000 ولدات مادونا ولدها روكو من راجلها الثاني، المخرج البريطاني غاي ريتشي، اللي تزوجات به فدجنبر من نفس العام فاسكتلندا، من بعد ما تلاقاو فحفل خاص نظمو المغني ستينغ ومراتو.

وفـ2005 خرجات ألبوم «Confessions on a Dance Floor»، اللي نتجو بشكل أساسي ستيوارت برايس، وكان فيه «Hung Up»  اللي استعمل لحن من فرقة «ABBA» السويدية، وولات الجولة ديالو أعلى جولة من حيث المداخيل لفنانة منفردة فداك الوقت.

وفنفس الفترة تقريباً، تبنات مادونا وريتشي الولد ديفيد باندا من مالاوي عام 2006، فبداية التزام إنساني طويل أسسات من خلالو مؤسسة «Raising Malawi» الخيرية، اللي بنات حتى عام 2013 عشرة مدارس قراو فيها 4 آلاف طفل.

مادونا سالات زواجها من ريتشي بالطلاق عام 2008، من بعد صداع على حضانة ولدهم روكو.

واصلات مادونا التبني بوحدها من بعد الطلاق، وتبنات الطفلة مرسي جيمس عام 2009، ومن بعد التوام إستير وستيل عام 2017.

فنياً، خرجات «Hard Candy» عام 2008 بالتعاون مع جاستن تيمبرليك وتيمبالاند وفاريل ويليامز، وحققات جولتها «Sticky &  Sweet»  أرقام قياسية جديدة.

فـ2012 خرجات مادون «MDNA»، وفـ2015 «Rebel Heart»، وسط نزاع قانوني مع ريتشي على حضانة روكو، اللي اختار يبقى مع باه فلندن.

وفالخطاب ديالها ملي تسلمات جائزة «امرأة العام» من «Billboard» عام 2016، انتقدات بصراحة التمييز ضد الناس الكبار فالسن، وخصوصاً العيالات فصناعة الموسيقى.

أما ألبومها «Madame X» عام 2019، فالاسم اللي عطاتو ليها أستاذتها الأولى فالرقص الحديث مارثا غراهام قبل عقود، خدا توجه سياسي كيف ما تأتر بالموسيقى اللاتينية، وكان فيه أغنية «Medellín» مع الفنان الكولومبي مالوما.

ولكن هاد الألبوم عرف واحد من أقوى مواقف مادونا فالتعامل مع سؤال العمر، ملي تعصبات على سؤال صحافية فـ «New York Times» على الكبر، ومن بعد هاجماتها ف «Instagram»، وقالت بلي الهضرة معاها خلاتها تحس بحال إلا تعرضات للاغتصاب، وهاد الحادثة كتكشف، بالمقارنة مع موقفها من بعد 2023، على التحول اللي وقع فعلا فالعلاقة ديالها مع فكرة التقدم فالعمر.

فـيونيو 2023، تلقات مادونا مغيبة فالشقة ديالها فنيويورك، وتنقلات للعناية المركزة بسبب عدوى بكتيرية دخلاتها فغيبوبة طبية دامت 48 ساعة.

مادونا هضرات من بعد على الحادثة وقالت إنها نسّات خمسة أيام من حياتها، أو من موتها، حسب التعبير ديالها، واضطرت تأجل الجولة ديالها «Celebration»، اللي كانت كتستعرض فيها مسيرة ديال ربعين عام.

فوق المسرح، تحولات جولة «Celebration» بين 2023 و2024 لطقس استرجاعي لفنانة قالت فواحد الوقت إنها كتكره تسمع الأغاني القديمة ديالها فالراديو، فالجولة رجعات قدمات الأغاني الأصلية ديالها بحضور جوج بناتها، لورديس اللي رقصات معاها «Vogue»، ومرسي جيمس اللي عزفات على البيانو.

فالمقابل، توقف مشروع الفيلم ديال سيرتها الذاتية، اللي كانت خدامة عليه مع كاتبة السيناريو ديابلو كودي، بعد خلافات على بنية القصة وعلى شكون عندو الحق يعاود حياة مادونا هي ولا كاتبة السيناريو.

وصلات مادونا للطوب فـ3 يوليوز 2026، مني خرج الألبوم الـ15 ديالها «Confessions II»، الجزء الثاني من ثنائية بدات بالألبوم الشهير ديالها قبل 21 عام.

الألبوم فيه إشارات للبدايات ديالها فنيويورك. أغنية «Danceteria» كيف رجعات اسم النادي اللي اكتاشفات فيه راسها، واستحضرات أسماء الفنانين باسكيات وهارينغ وديفيد بيرن.

ولكن هاد الرجوع للماضي جا حزين فأغنية «Fragile»، لي جات مباشرة من بعد وفاة شقيقها كريستوفر، بدات الأغنية بعبارة حزينة منطوقة كتقول إن الطاقة ما كتموتش، غير كتدوز.

وفـ8 يوليوز 2026، وقفات مادونا من جديد فوق أضخم منصة عالمية ممكنة، بين النهائي لكأس الشوطين فكأس العالم، مع شاكيرا وفرقة «BTS» وجاستن بيبر، الشي لي كيبين أن مادونا طاقة متجددة كتولد من الرماد.