كود كازا ///

البارح لثلاث 15 اكتوبر 2024 خرجات “كود” خبار على توسيع “لونسا” اي المكتب الوطني للسلامة الصحية للمنتجات الغذائية٬ فيه تحديد لقائمة الدول اللي مسموح يستورد منها المغرب لحم الغنمي والبگري. عدد الدول 45 دولة.

هاد القرار جا بعد اجتماعات مع رئيس الحكومة باش يبقى اللحم فمتناول المغربي. لكن قرار “اونسا” او خطوتها الاستباقية باش يتحل السوق المغربي للحوم هاد الدولة بوحدو ما كافيش.

هنا جناتي مدير “لونسا” ماركا بيت على وزير الفلاحة الصديقي. دابا الكورة عند الوزير لكن حتى واحد ما يقدر تستورد الغنمي والبكري ورسوم الاستيراد طالعة بزاف بزاف. واصلة ل200 بالمائة.

وزارة الفلاحة عليها تدخل باش تهبط من الرسوم الجمركية. بلا هاد التحرك وبلا هاد الاجراءات من قبل الفلاحة كيف دارو مع زيت العود٬ غادي يزيد يطلع اللحم.

رئيس الحكومة باش جمع المتدخلين فالقطاع السيمانا اللي فاتت٬ كان باش يتحرك كل مسؤول من بلاصتو. “لونسا” بدات وخاص لخراين يوصلو عليها