كود كازا ///

الدولة المغربية قررات ما تعاملش المنتخب الكونگولي بالمثل. هاد المنتخب وصل البارح الاحد 27 مارس 2022 لمطار محمد الخامس فكازا باش يلعب ماتش الروتور فباراج مؤهل لمونديال قطر.

المنتخب المغربي لكرة القدم كان عانى بزاف بزاف فكنشاسا. جاب التعادل بواحد لواحد وتكرفص هو والوفد الرسمي والجمهور. ما خلات هاد الدولة ما دارت باش تشتت تركيز اللعابة. فشلو فمخططهم.

الدولة المغربية قررات تحتارم المنتخب المنافس. نزل ف”مازاكان” وممنوع شي حد يقرب ليه. اصلا باش تدخل لهاد لوطيل صعيب. يعني ما غاديش يجي الجمهور فالليل ويبقى طالق الموسيقى باش ما ينعسوش اللعابة كيف دارو لينا فماتش الذهاب.

وفق مصادر “كود” فالجدرامية حاضيينهم فكل تحركاتهم. ما مخليين حد يقرب منهم. اكثر من هادا تضيف مصادر “كود”٬ جاو شي وحدين وبغاو يردو ليهم الصرف. الجدرامية تضيف مصادر “كود” شدو منهم واتهمو رئيس نادي ماشي بيضاوي. قالو حسب مصادر “كود” باللي هو اللي جابهم.

طبعا صعيب تتأكد، يقدرو يطيحو الباطل على هاد الرئيس. المهم القضية تحلات. كانو مازال ما دارو حتى شي تصرف يقدرو يتابعو عليه.