كود سبور//

كايلعب البرتغالي ريكاردو سا بينتو مدرب الرجاء الرياضي، آخر الأوراق ديالو وعندو آخر فرصة باش يعتق راسو من الإقالة ويعتق الرئيس ديالو عادل هالا من حرج الاختيار الخاطئ في التوقيع معه، ملي غايلعب الفريق اليوم الاحد ضد ماميلودي صن داونز الجنوب إفريقي ببريتوريا بجنوب إفريقيا ضمن الجولة 3 من دور مجموعات دوري أبطال إفريقيا.

الرجاء الرياضي اللي حقق بداية كارثية مع ريكاردو سا بينتو في دور مجموعات دوري أبطال أفريقيا، بخسارة مع الجيش الملكي بالميدان في الجولة الأولى وتعادل مع فريق متواضع بحال مانييما يونيون الكنوگولي بكينشاسا، وجمع نقطة يتيمة حتى لدابا من أصل 6 نقاط كانت ممكنة، مع مستوى وأداء ضعيف، ولا يرق لمستوى تطلعات الجماهير الرجاوية، مطالب اليوم بتحقيق الرباح بجنوب إفريقيا على ماميلودي صن داونز، أو على الأقل ما يخسروش، حيث الخسران راه كايعني تأزم وضعية الفريق وتقلص الحظوظ ديالو من أجل التأهل إلى الدور المقبل، وبالتالي غاتزاد أصوات المطالبين بإقالة المدرب ريكاردو سا بينتو وهذا الشي يقدر يتحول إلى ازدياد عدد المطالبين حتى برحيل عادل هالا رئيس الرجا من النادي، هو والمكتب ديالو، حيث حتى لدابا وبعد مرور 2 جولات من دور مجموعات شومبيونزليگ و12 ماتش لعبهم الفريق فالبطولة الاحترافية، كايبان أن الاختيارات اللي داروها لتعويض المدرب السابق الألماني جوزيف زينباور كانت غالطة، ونفس الشي بالنسبة للاعبين اللي جابوهم فالصيف الماضي، حيث ما قدروش يعوضو اللاعبين اللي مشاو ولا يقويو صفوف الفريق، اللي مطالب يدافع على الازدواجية اللي ربح العام الماضي تحت رئاسة الرئيس السابق محمد بودريقة، ويوصل لأدوار متقدمة في دوري أبطال أفريقيا.

ريكاردو سا بينتو اللي قال خلال الندوة الصحافية قبل ماتش الرجاء الرياضي وماميلودي صن داونز الجنوب إفريقي، إن المباراة غاتكون صعيبة ولكن ماشي مصيرية، ومازال لاعبين 3 الماتشات فالمغرب، فبهذا التصريح إما بغى المدرب البرتغالي يحيد به الضغط على راسو وعلى اللاعبين أو غير مدرك لقيمة المواجهة والوضع الحرج اللي فيه الرجا حاليا، حيث خسارة الرجا إلى تقدرت فهاد المباراة، غاتضعّف بزاف حظوظ الفريق اللي مازال غايلعب بالميدان ديالو غير 2 ماتشات، واحد ضد صن داونز، والثاني ضد مانييما الكونگولي والماتش الثالث ضد الجيش الملكي اللي غايكون بمديان الاخير، وغالبا بلا جمهور الرجا في إطار المعاملة بالمثل كيفما حضر غير جمهور الخضرا فماتش الذهاب.

وطبعا راه نوفل الزرهوني لاعب الرجا، وخلال نفس الندوة الصحافية رد على المدرب وقال أن المباراة مصيرية، حيث عارف قيمتها وهنا كايبان ان اللاعبين وجمهور الفريق كايعومو فواد والمدرب سا بينتو واللي سنا معاه لتدريب الرجاء بشرط 500 مليون لفسخ العقد كايعمومو فواد، وأن الماتش ضد صن داونز اليوم، هو ماتش مصيري وخاص الرجا يخرجو يلعبو كورة ويقلبو على الرباح بأي طريقة.