الرئيسية > كود سبور > ماتش الأسود ولاروخا خالق الرعب فإسبانيا والقنصليات المغربية وأئمة المساجد دخلو على الخط
05/12/2022 19:00 كود سبور

ماتش الأسود ولاروخا خالق الرعب فإسبانيا والقنصليات المغربية وأئمة المساجد دخلو على الخط

ماتش الأسود ولاروخا خالق الرعب فإسبانيا والقنصليات المغربية وأئمة المساجد دخلو على الخط

كود سبور//

كتعيش إسبانيا استنفار أمني واجتماعي كبير بسبب ماتش ديال منتخبها ضد المنتخب الوطني المغربي غدا الثلاثاء فثمن نهائي كأس العالم قطر 2022، وسط مخاوف من اندلاع أعمال شغب ما بين الجالية المغربية والعرب والمسلمين وبين الإسبان بالمدن ديالها بسبب هاد الماتش والنتيجة ديالو، خصوصا وأن الرباح كيعني تأهل واحد من المنتخبين والخسارة كتساوي  الإقصاء للآخر.

وسلطت جريدة “El confidencial” الإسبانية على الأجواء فالمدن الإسبانية اللي ساكنين فيها بزاف ديال المغاربة والمسلمين، وأكدت بلي هاد المدن ملي تعرف أن إسبانيا والمغرب غادي يلعبو ضد بعضهم فثمن نهائي كأس العالم، والحياة فيها ماشي طبيعية وكلشي خايف من اندلاع أعمال العنف والشغب، وقالت بلي صحيح كاينين مخاوف من اندلاع أحداث شغب من طرف محسوبين على الجالية المغربية ولكن راه حتى جمعيات المهاجرين فإسبانيا كتشتكي من العنصرية ديال الإسبان تجاه المغاربة على مواقع التواصل الاجتماعي.

واختارت الجريدة المذكورة مدينة ألميريا والحياة اللي هاد الأيام ماشي طبيعية فيها، وقالت بلي قنصلية المغرب فيها نبهت المغاربة من الدخول فصدامات بسبب الماتش، وكاين انخراط ديال المجتمع المدني فتأطير الجالية المغربية والمسلمين فألميريا، ومن بينهم عبد الله مهنا، وهو إمام واحد الجامع فالمدينة، واللي فرق الإعلان ديال القنصلية المغربية وكان عندو تحفظ حسب الجريدة، حيث مكتوب بالعربية بوحدها وكيشوف بلي كان خاص يكون هاد الإعلان مكتوب حتى بالدارجة حيث بزاف ما كيفهموش العربية، فالوقت اللي إمام بجامع آخر فمدينة مدرسية استغل خطبة صلاة الجمعة الماضية باش يحسس المغاربة والمسلمين بتجنب الاحتقان ديال الماتش والتحلي بالروح الرياضية وقالهم يتكالماو ومن الأحسن يبركو فالبيوت ديالهم نهار الماتش ما بين اسبانيا والمغرب.

نفس المصدر، قال أنه ملي تعرف بلي المغرب غادي يوصل لثمن النهائي فالمونديال وأن المنافس ديالو غادي يكون المنتخب الإسباني، وهي تضاعف دعوات السلام والتعايش فالأحياء والمدن واللي ساكنين بزاف المهاجرين المسلمين فإسبانيا، وهادشي ما شي غير من الأئمة ديال الجوامع ولكن حتى من القنصليات المغربية وجمعيات المهاجرين سوا الدينية أو المدنية وحتى من السلطات الإسبانية، فحال عمدة لوركا دييكو خوسي ماتيوس وهو اشتراكي اللي وجه دعوة وأكد بلي اللي بغى يحتفل من الطرفين خاصو يحترم قواعد التعايش.

الجريدة الإسبانية أكدت بلي ماتش المغرب ولاروخا، غادي يكون اختبار بالنسبة للجالية المغربية المقيمة فإسبانيا، واللي كيبلغ عدد أفرادها 776000 شخص حسب المعهد الإسباني للإحصاء، إضافة لـ300000 واحد من اللي خداو الجنسية الإسبانية فالسنوات الأخيرة واللي محافظين على الجنسية ديالهم الأصلية (زعما متبثين بتامغرابيت وخا كيخدمو بالجنسية الإسبانية باش يقديو مصالحهم).

وغادي يتبين حسب الجريدة غدا الثلاثاء، واش هاد النداءات اللي دارو الزعماء ديال الجالية المغربية فإسبانيا غادي يدير بها المغاربة وخصوصا الشباب منهم، أكدت بلي المؤشرات الأولى وإلى حدود الآن مشجعة، ولكن اللي مخلي كلشي مبرزط هو داكشي اللي وقع من أعمال شغب فبروكسيل من بعدما ربح المغرب بلجيكا وكندا وتأهل لدور 16 من كأس العالم.

موضوعات أخرى

03/02/2023 08:51

الرباط ومدريد متمسكين باش يبقاو محافطين على العلاقة بين المغرب والاتحاد الأوروبي وتعزيزها

03/02/2023 08:50

اتفاق مغربي – إسباني على مواصلة الاختبارات التجريبية للديوانة التجارية فالمعابر وفتحها تدريجيا

03/02/2023 08:20

كانت كدير الوساطة فلاسيرونس بلا ترخيص.. محكمة برشيد حكمات على مرا بعام ونص ديال الحبس

03/02/2023 07:00

حيفظي باي باي من الباطرونا بسباب التنوعير والقوالب لي مورط فيها مولاه النعمة ميارة