نجوى المالحي-كود//

فريق عمل مسلسل “الماضي لا يموت” من بطولة فاطمة خير ورشيد الوالي كيصورو حاليا الجزء الثاني في كازا في ظروف قاصحة مع جايحة كورونا وارتفاع الاصابات في الجهة.

وهاد العام غادي يعرف مشاركة بعض الأسماء لا علاقة ليها بالفن لا من قريب ولا منن بعيد، عندهم فقط متتبعين في مواقع التواصل.

جوج سيدات (ايمان وصفية) حطو ستوريات على حساباتهم في انستگرام، هادي يوماين، وقالو غادين يشاركو في المسلسل لي حقق نجاح كبير وبقاو كيتشكاو من التعب ديال تورناج.

طبعا التمثيل والتصوير صعيب وكيحتاج جهد كبير نيت ماشي بحال تبوسطي فالسوشل ميديا ودير جوج ستوريات وتشد فلوس نوعا ما باردة.

السؤال دابا هو شكون كيدخل هاد الناس للتلفزة، شكون باغي يفرضهم على المشاهد.

واش على قلة الأسماء لي كتمثل، ومالاقياش فين وعامن، وخاصة مع هاد الازمة الممثلين الحقيقيين راهم غير مشومرين.