كود ـ الرباط//

قيادي بارز فحزب الاستقلال محسوب على تيار حمدي ولد الرشيد، سولاتو “كود” صباح اليوم على مؤتمر الحزب امتا وكيفاش؟. جاوب بصراحة :”المؤتمر باقي بعيد ومكنفكروش فيه دبا”.

قيادي آخر كان صرح لـ”كود” بلي مور العيد الصغير يديرو خلوة تنظيمية ويحددو تاريخ المؤتمر، فعلا دارو خلوة فكلوب نيوتيك ولكن مقدروش يحددو المؤتمر.

الحزب حاليا، كما تنص القوانين الجاري بها العمل، معندوش شرعية قانونية وهادي بوحدها فضيحة لحزب باغي يدير التوازن فالحكومة، حيث هو محافظ فالعقيدة ومقدرش يحافظ على القانون.

وفضل عدد من قادة حزب الاستقلال السفر وقضاء العطلة والاستمتاع بأجواء الصيف، بدل عقد اللقاءات والبحث عن حلول لمشكلة التنظيم الحزبي.

كولشي عارف بلي المؤتمر بيد ولد الرشيد، حيث هو لي ساهم فصعود نزار بركة، وهو لي ممكن يهبطو بتحكمه في جل التنظيمات الموازين خصوصا برلمان الحزب.

مصدر حزبي قال بلي كلمة نزار بركة غير مسموعة داخل التنظيم، وأن الأمين العام الحالي مقدرش يفرض أجندة تنظيمية واضحة، إضافة إلى أن الانشغال ديالو كبير بأزمة الماء.