كود الرباط//

ادريس الأزمي الإدريسي، رئيس المجلس الوطني لحزب العدالة والتنمية، كشف اليوم فندوة صحافية دارها الحزب، على التحضيرات ديال المؤتمر الوطني التاسع، خصوصا تعديل النظام الأساسي ديال الحزب، والأطروحة السياسية اللي غادي يعتمدها الحزب فالمرحلة الجاية.

الازمي اكد كذلك على ان القطيعة السياسية بين بنكيران ولشكر واخنوش مستمرة، وقال بلي مصيفطش الحزب دعوة لكل من  عزيز أخنوش، رئيس حزب التجمع الوطني للأحرار، وادريس لشكر الكاتب الاول لحزب الاتحاد الإشتراكي.

وأضاف: “الدعوات لحضور المؤتمر لي غايكون ف اواخر ابريل، ترسلات لجميع الأحزاب بلا استثناء، ولكن كاينين بعض الأسماء اللي ما عيطناش ليها، باش المواطن يحترمنا ويفهم مزيان شنو واقع فالساحة السياسية”.

واوضح الأزمي باللي حتى إدريس لشكر، الكاتب الأول ديال حزب الاتحاد الاشتراكي، ما عيطش ليه الحزب بسبب العلاقة المتوترة معه، ولكن عيطو لرؤساء الفرق البرلمانية ديالهم. وشدد أن الأحزاب السياسية عندها مسؤولية كبيرة فترشيح ناس فاسدين للمسؤوليات فالبرلمان والجماعات.

فالمقابل، ديال عدم دعوة زعماء مغاربة، قال الازمي بلي الحزب عيط ل 25 شخصية أجنبية من خارج المغرب، لحضور مؤتمر الحزب.

وافاد لأزمي، بلي وفد مهم من حركة ”حماس” غايكون حاضر  فالمؤتمر.