كود الفنيدق///

مازال شبح الهجرة كيرمي بظلالو على سبتة، وكيزيد يحصد أرواح شباب حالمين بفرصة حياة جديدة ما وراء البحر.
فالصباح ديال اليوم الأربعاء، 10 شتنبر، حوالي العاشرة، عثرات السلطات على جثة شاب فـ منطقة “سان أمارو” حدا “إنفانتا إلينا”، وبهاد الجثة الجديدة كا يولي العدد الإجمالي ديال الجثث اللي تْنتاشلات من بداية 2025 حتى دابا هو 28 حالة.

هاد الجثة هي الثانية اللي كتْكتاشف فـ أقل من 24 ساعة، فإشارة واضحة لقساوة وضغط الهجرة عبر البحر بالسباحة ولا بمحاولات فاشلة على متن قوارب.

المعطيات الأولية كاتقول باللي الشاب على الأرجح من أصول مغاربية، كان لابس سروال وتيشورت، ومعاه عوامة وزعانف سباحة زرقين. هاد التفاصيل كترجح باللي كان باغي يوصل لسبتة سباحة، أو يمكن كان فواحد القارب اللي رماوه فالبحر. المؤشرات كتأكد أن الوفاة وقعات ساعات قليلة قبل ما يلقاو الجثة.

المكان اللي تْلقات فيه الجثة كان صعيب يوصلوه القوارب، الشي اللي خلا عناصر الحرس المدني يهبطو على رجليهم باش يتحققو من أن الأمر كا يتعلق بآدمي. من بعد تأكدهم عيطو على فرقة الأنشطة تحت المائية اللي أشرفت على عملية الانتشال ونقل الجثة للمركز، فانتظار استكمال الإجراءات القانونية.
مرة أخرى، البحر كيشهد على المأساة الإنسانية ديال شباب كيغامرو بحياتهم، كيحلمو بواقع أفضل، لكن كيتصدمو بجدار الموت، وما تكون النهاية جثث تطفو فوق الماء..