كود -وكالات//

شركة الروبوتات الصينية UBTech كشفات على روبو بشري جديد سميتو U1، ولي مصمم باش يتصنع بكميات كبيرة، الثمن ديالو كيبدا من  15 ألف و400 أورو، ويقدر يوصل حتى لـ127 ألف أورو فالنسخة بروس ماكس .

الشركة كتقدم هاد الروبو كحل ليعايش وحدو ، حيث يقدر يهضر مع الناس، يونسهم، يعطيهم دعم عاطفي، يفكرهم ياخذو الدوا ديالهم.

ومن بين الحوايج اللي كتميزو، أنه يمكن يتصايب على حسب رغبة الكليان، بغيتيه كيشبه لشي واحد عزيز ، أو لمشاهير، أو حتى شخصية خيالية، وحسب الشركة، الطلبات اللولة وصلات لعشرات الآلاف، ومن المنتظر يبدا البيع فشهر شتنبر.

الروبو متوفر بجوج نسخ: ذكر ونتوة، بطول 1.83 متر و1.68 متر، وعندو 88 نقطة حركة فالمفاصل، وعنق كيتحرك ، باش يقلد حركات الإنسان بطريقة طبيعية.

الكادر الخارجي ديالو مصنوع من سيليكون كيشبه لجلد الإنسان، باش يعطي إحساس أكثر واقعية وسط التفاعل ،وحتى تعابير الوجه ديالو متناسقة  مع الكلام، حيث الفرق بين الصوت وحركة الشفايف قل من 20 جزء من الألف من الثانية.

أما الذكاء الاصطناعي اللي خدام بيه، فهو مدرب باش يتعرف على كثر من 20 نوع ديال المحاسيس ، من ملامح الوجه ونبرة الصوت، وكتقول الشركة بلي دقة التعرف عليها كتفوت 90%.