كود -فاس//

تفتحات التسجيلات فمسابقة “ملكة حب الملوك” لعام 2026 فمدينة صفرو، هاد المبادرة دارتها وزارة الشباب والثقافة والتواصل بشراكة مع جماعة صفرو، فإطار التحضيرات للدورة 102 ديال مهرجان حب الملوك، اللي غادي يتنظم تحت الرعاية السامية ديال سيدنا، ما بين 24 و27 يونيو الجاي.

اللجنة المنظمة كتعتمد فمرحلة الانتقاء الأولي على المعايير   الاجتماعية والإنسانية اللي كيتقدمو بها المترشحات. ومن بين الشروط، خاص المترشحة يكون عمرها ما بين 18 و30 عام، والطول ديالها ما يقلش على 1.65 متر، ويكون عندها مستوى ثقافي مزيان وكتتقن كثر من لغة، وزيد عليها تكون عندها سمعة مزيانة.

وتحدد 31 ماي 2026 كآخر أجل باش يتحطو ملفات الترشيح من الموقع الإلكتروني ديال المديرية الجهوية للثقافة فجهة فاس مكناس ،ومن المنتظر يتعلن على الفائزة بلقب الملكة والوصيفات ديالها فحفل رسمي غادي يتدار فرياض الجماعة نهار 24 يونيو، ومن بعد غادي يكون حفل التتويج الشعبي فاليوم اللي من بعد، مع الافتتاح الرسمي ديال المهرجان.