أنس العمري -كود///

كيروج وسط المغاربة هاد الأيام فيديو لامرأة اقتحمت أحمد فروع مطاعم ماكدونالد اللي كاين فطنجة. هاد الفيديو ما معروفش وقتاش تصور. مصدر ل”كود” اكد باللي البارح وول البارح ما كانت حتى شي شكاية من هاد المطاعم ضد اي شخص. لكن مصدر ل”كود” هدر على حادثة وقعات فطنجة نهار 25 أكتوبر اللي فات.

وفق مصدر “كود” دخلات مرا وبدات تغوت على لكليان وتهاجمهم باش ما يدخلوش لهاد المطعم ويقاطعوه بسباب الحرب فغزة. كان عددهم وفق مصدر “كود” 3.

حسب مصدر “كود” المسؤول على المعطم عيط فالبلاصة على البوليس اللي جا وداها ستامع ليها باشراف النيابة العامة اللي قررات تابعها.

دابا أي واحد بغا يقرب لأي مطعم ويدير بحال هاد العنتريات غادي يتحاكم، كيفما وقع فحالة هذه السيدة التي ستقول العدالة كلمتها في حقها. ويعاقب القانون المغربي على مثل هذه الجنحة بالحبس والغرامة، أو إحدى العقوبتين.