كود – The Verge//

فواحد الفكرة لي يمكن تبان غريبة ولكن زوينة، المخترع الفرنسي كريستيان بوانشيفال ابتكر حبوب مكملات غذائية كيقول بأنها قادرة تبدّل ريحة الغازات البشرية وكتخليها تشبه ريحة الورد، والشكلاط، وسكين جبير ولا نكهات أخرى، عوض الريحة المعروفة لي كيشكي منها بزاف د الناس.

هاد الكينات مصايبة من مكونات طبيعية، وكيتم تسويقها فشكل مكمل غذائي ماشي دوا، الشركة كتقدّمها كحل لمشكل يومي كيوقع لأي واحد، بلا ما تعتبرها علاج طبي أو وصفة مرخّصة.

الاختراع ماعندو حتى إثبات طبي أو تجارب سريرية كاتأكد فعاليتو، ولكن وخا هاد الشي، الفكرة شدت انتباه كبير فالمواقع الاجتماعية، ودارت ضجة حيث الناس شافوها واحد من أغرب المنتجات لي كتقترح حلول لمشاكل محرجة فالحياة اليومية.

كيبقى هاد النوع ديال الكينات مثال على كيفاش الإبداع التجاري كيحاول يدخل حتى لأدق التفاصيل ديال حياتنا بما فيها ريحة لي ݣاز، وكاين لي زاد طالب حتى بنكهات اخرين بحال النعناع وفليو والقهوة، ونت عزيزي القارئ اشمن نكهة كتفضل؟