كود – وكالات //

الخميرة اللي كاينة فـالخبز والبيرة، المعروفة علمياً بـ Saccharomyces cerevisiae، ولا اليوم عليها اهتمام علمي كبير، بعدما ورات دراسة جديدة  بلي عندها قدرة على المساهمة فمحاربة أمراض خطيرة بحال أمراض الميتوكوندريا، البحث دارو علماء من المركز الوطني لأبحاث القلب والأوعية الدموية (CNIC) فإسبانيا، ونشرو نتائجو فمجلة علمية معروفة ، الشي اللي عطى للموضوع مصداقية علمية كبيرة.

الميتوكوندريا كتعتبر  “محكات ديال الطاقة” وسط الخلايا، حيث كتربط استهلاك الأوكسجين بإنتاج الطاقة، وكتساهم حتى فتصنيع عناصر أساسية بحال النيوكليوتيدات اللي كيتصايب منهم الـDNA وRNA ،ملي كتخسر هاد الوظيفة، كيبدا الخلل فالخلايا وكيبانو أمراض خطيرة بحال متلازمة” لي “وساندروم “بارث”، وهما أمراض غابرة ولكن مدمّرة، وغالباً ما ما كاينش ليها دوا.

الفريق العلمي اللي كيقودو الباحث خوسي أنطونيو إنريكيز قدر يلقى حل مني خذا جين من الخميرة سميتو ScURA، وركّبو فخلايا بشرية وخلايا ديال الفيران اللي فيها خلل فالتنفس الخلوي. هاد الجين عطى للخلايا “طريق سوكور” فالأيض باش تصايب النيوكليوتيدات بلا ما تعتمد على الميتوكوندريا، وهاد الشي تكبر   وتخدم بحال الخلايا لي سالمة.