كود – اسبانيا//
لندلوس قرّرات توقف القراية الحضورية فجميع المدارس والمعاهد غدا لاربعا 4 فبراير 2026 بسبب العاصفة ليوناردو، اللي متوقّع تجيب الشتا المجهدة بزاف ورياح قوية وخطر ديال الفيضانات فعدد كبير من المناطق، القرار خداتو الحكومة الجهوية ديال أندلسيا من بعد اجتماع لجنة الطوارئ، برئاسة خوان مانويل مورينو، فين ترفعات خطة الطوارئ للمرحلة الثانية لمواجهة مخاطر الشتا والحملات .
هاد التوقيف كيشمل جميع مقاطعات الأندلس، من غير ألميريا، مني قالت السلطات باللي التوقعات فيها ماشي خطيرة بحال باقي المناطق، ولكن وخا هكاك غتبقى تحت المراقبة طول النهار. الأرصاد الجوية حذّرات من أمطار طوفانية عمرها ما جات خصوصاً فمناطق بحال غرازاليما، روندا، وجبال كوستا ديل سول، مع إنذارات حمرا وتنبيه من فيضانات فالويدان والأنهار.
وزيادة على هاد الشي، فعّلات السلطات وحدات الطوارئ بحال وحدة الطوارئ العسكرية UME وموارد أخرى باش تكون واجدة لأي تدخل سريع، خصوصاً فالمناطق اللي مهددة كثر، باش يتفاداو أي خسائر بشرية ومادية.
حسب آخر المستجدات لي خرجات اليوم، الحكومة الجهوية أكدات على البلوكاج ديال القراية الحضورية لنهار الخميس 5 فبراير فݣاع مقاطعات الأندلس، من غير ألميريا إلا فحالة بان شي جديد.
موضوعات أخرى
تلميذ ففرنسا خبا جويجة صيد فصاك ديال الغيتار قبل ما يجبدها عليهم وسط الكوليج
عيالات كيرسمو ملامح الاقتصاد وداخلات لمراكز القرار فالمغرب
