كود – عن ليبراسيون//

نقلات صحيفة «ليبراسيون» الفرنسية، اليوم الاثنين 17 غشت 2026، نداءً للكاتبة الفرنسية من أصل مغربي ليلى سليماني، كتطالب فيه بالسماح للناشطة النسوية المغربية ابتسام لشگر بالخروج من السجن والاستفادة من العلاج الطبي الضروري.

وقالت الصحيفة باب ابتسام لشگر دازت عام كامل فالحبس، بعدما تحكم عليها بـ30 شهر ديال الحبس وخطية ديال 5000 أورو، على قبل نشرها سيلفي وهي لابسة تيشورت عليه شعار اعتبراتو السلطات المغربية مسيئ للإسلام.

وحسب «ليبراسيون»،  الوضع الصحي ديال ابتسام ولى مقلق بشكل كبير، خصوصاً أنها سبق ليها عانت من سرطان العظام وخضعات ف 1996 لعملية استئصال جزء من عظم  وتركيب طرف اصطناعي كامل فالذراع.

وضافت الصحيفة أن الطرف الاصطناعي ولى مرخي من الكتف والمرفق مني دخلات الحبس، الشي لي كيسبب ليها آلام قوية ، فـوقت ما كتقدرش تستافد من العلاج الجراحي المناسب.

ونقلت «ليبراسيون» على ليلى سليماني أن الأطباء اللي اطلعو على الملف الطبي ديال ابتسام حذرو من أن التأخر فالعلاج يقدر تكون عندو عواقب خطيرة، من بينها بتر الذراع وحتى الوفاة.

ودعت سليماني، حسب الصحيفة، لتعامل مع وضع ابتسام باعتبارو حالة إنسانية مستعجلة، وأكدات أن القضية ما بقاتش غير مرتبطة بالحرية، وإنما ولات مرتبطة حتى بالحفاظ على حياتها.

كما شارت «ليبراسيون» بلي القانون المغربي   كيسمح، فحالات معينة، باستبدال العقوبات الحبسية بعقوبات بديلة، من بينها الخدمة للمصلحة العامة أو المراقبة الإلكترونية.