سعاد زرار – كود الصويرة//

https://www.facebook.com/share/v/aoCHGdWsQ3J1Deci/?mibextid=WC7FNe

البارح الجمعة 28 يونيو 2024 كانت ليلة فلسطينية فاليوم الثاني من مهرجان گناوة 25 بالصويرة.

بدا هاد الدعم من الكوكتيل اللي دارتو شركة معروفة ديال لوطيلات مع الثمنية ونص على لبحر. جاوه ناس مختالفين. مدراء مؤسسات عمومية وباطرونات شركات خاصة وسياسيين وعيالاتهم وشي شخصيات جايين من برا. المثير فهاد السهرة الكوكتيل هو بعض الحضور هاز الكوفية الفلسطينية. شي محزم او محزمة بيها. شي دايرها على ظهرو. شي دايرها فعنقو….

البورجوازية باغية تبين باللي مع فلسطين. هاد الشي فيه بزاف شوفوني كندعم غزة. اللي كيدعم قضية ما كيكونش دعمو بوشاح فلسطيني. بكوفية فلسطينية. ويديرو وسط شعب كيتنفس القضية. لدرجة كيفضلها على قضايا بلادو. ممكن تفهم برا فمجتمع فيه لامبالاة لهاد القضية، لكن وسط لمغاربة وتظهر دعمك لقضية تعتبر قضيتهم، فيه شوفوني وصافي.

بعد هاد الكوكتيل كانت سهرة ولد غزة الفلسطيني الفرنسي الاميركي “سان لوفون” بساحة مولاي الحسن وبالضبط مع لطناش. سهرة كان فيها العلم الفلسطيني. وكانت حاضرة الكوفية الفلسطينية.

لمغاربة تفاعلو مع اغانيه لكن تصدمو من تصرفو باش عطاوه الدرابو المغربي. عطاوه ليه باش يكبرو بيه وهو لاحو وغادر الخشبة. للي حضر لسهرة البارح حس بالاهانة . كيفاش تعطيك بلاد عارضة عليك ودارت مجهود باش تقدم سهرة وفاللخر تلوحو.

تصرف غريب واللي زاد فقص اللي حضر هو تكرارو بدون مناسبة على علاقتو بالجزائر. عادي يجبد بلاد امو (فرنسية من اصل جزائري) ولكن كثر من هاد لشي.

لمغاربة جاو يشوفو الفن. جاو يشوفو مغني عاش سنوات فغزة. هو نيت ركب على هاد العاطفة وقال فالسهرة باللي القصف الاسرائيلي ريب اوطيل ديال باه فغزة.

سهرة فاتت شي ساعة وربع. شفنا مغاربة مؤخرا خارجين كيطالبو بمقاطعة مهرجان غير حقاش كاينة الحرب فغزة، اليوم فالصويرة شفنا ولد غزة اللي بدا شهرتو فالتيك توك وفيديو كليب مع ملكة البورنو العربي ميا خليفة، ناشط. ربح فلوس من بلاد وما حتارمش درابو هاد لبلاد. شفنا ملايرية بغاو يعيقو بالكوفية وما حلوش فمهم باش وقعات الاهانة. شفنا فلسطيني كيبين حبو للجزائر فبلادنا.