أميمة عطية كود كازا ///

عاشت بزاف ديال المناطق والأحياء فكازا البارح من ورا 12 د الليل، أجواء استثنائية جمعات ما بين الخلعة والفرحة والاحتفال، ودوزات عائلات كازاوية ليلة بيضا على أعصابها، شادين التيليفونات وكيتسناو  نتائج بناتهم وولادهم لي مدوزين الباك.

ومع أولى الدقائق من صباح الأربعاء 17 يونيو بدات نتائج البكالوريا كتوصل لتلميذات وتلامذ في ميساجات (SMS) وبريد Taalim.ma. وفي دقيقة وحدة، تقلبت الأجواء لعرس كبير.

وبدا زغاريت من شراجم الديور فعدة مناطق منهات عين السبع، وحتا في لمناطق لي حداها، وسيدي معروف والولفى والمعاريف.. وخرجو العائلات وولادهم للناجحين للشاريع وشعلو فلامات، وبدا صوت كلاكسونات الطوموبيلات كيتزاد.

وفي نفس الوقت، انتشرات فيديوهات في مواقع التواصل الاجتماعي كتوثق لهاد الفرحة، وبانوا فيها تلامذ كيبكيو بالدموع وأمهات كيزغرتوا ويعنقوا ولادهم، لي من بعد عام ديال لقرايا والاجتهاد والصبر جناو الثمار ديالهم.

وفهاد السياق، صدرت وزارة التعليم بلاغها الرسمي فهاد الصباح الأربعاء 17 يونيو وعلنات فيه على الارقام الرسمية للناجحين وناجحات، لي بلغو 262 ألفاً و442 مترشحة ومترشحاً من الممدرسين بالتعليم العمومي والخصوصي.

من بينهم 154 ألفاً و881 من الإناث، أي ما يمثل 59% من مجموع الناجحين.

ووصلت نسبة النجاح العامة إلى 64,8%. فيما بلغت لدى الإناث 68,7% مقابل 60% لدى الذكور.

وللإشارة، فالدورة الاستدراكية غادي تكون  أيام 2 و3 و4 يوليوز 2026.