وكالات//

شعل حريق كبير ليلة راس العام فكنيسة تاريخية راجعة لعام 1872، وسط العاصمة الهولندية أمستردام، وهاد الشي تسبب فطيحان برج الكنيسة وطلوع الشّعالة حتى لوسط المدينة.

وقالت عمدة أمستردام، فمكه هالسيما، بلّي الحريق كان قوي ومخوف بزاف، وأكدات أن الأولوية كانت لحماية السكان اللي حداه، وهاد الناس تفرّغو دابا من ديورهم دقة وحدة كإجراء احترازي.

السلطات دارو تنبيه عام وطلبو من المواطنين يبعدو على بلاصة الحريق ويسدو الشّراجم والبيبان، حيت كانو جمرات شاعلين كيطيرو فالاتجاه ديال مناطق سكنية قريبة.

هاد الكنيسة اللي تصممات على يد المهندس الهولندي المعروف بيتر كويبرس، كانت فالأول مكان للعبادة ومن بعد ولات قاعة ديال المناسبات، وكاينة فجنب حديقة فوندل المشهورة فالمدينة.

وحسب التحقيقات اللّولة، كيرجحو يكون الحريق مرتبط بالشهب النارية اللي تطلقات فاحتفالات راس العام، وهاد الشي تكرر حتى فمناطق خرين فالمدينة فداك الليل.