كود الدريوش//

عرفت مدينة العروي والدريوش ليلة البارح الجمعة ليلة صعيبة دازت، بعدما تهاطلات أمطار غزيرة بزاف، حولات الشوارع إلى أنهار جارفة وغمرات المحلات والمنازل بالمياه، مسببة خسائر مادية كبيرة ومعاناة وسط السكان.

فمدينة العروي، خصوصا فـ”شارع طنجة”، السيول كانت قوية بزاف، والمياه دخلات لعدد من الديور والحوانت، وخلفات خسائر فالأثاث والسلع والبضائع. الساكنة اضطرات تستعمل السطولا باش تحاول تصرف المياه اللي دخلات للبيوت، وسط حالة من الخوف والارتباك.

عدد من المواطنين عبرو عن سخطهم وغضبهم من تكرار نفس المشهد كل موسم مطري، مؤكدين أن المشكل الحقيقي هو هشاشة البنية التحتية وضعف قنوات الصرف الصحي اللي ما قادراش تستوعب كمية المياه اللي كتنزل فوقت وجيز. وطالبو السلطات المحلية والجماعة يتدخلو بسرعة ويصلحو الشبكة قبل ما يتحول المشكل إلى كارثة بيئية وإنسانية.

أما فـجماعة اتروكوت بإقليم الدريوش، فالأمطار الطوفانية تسببات فـفيضانات قوية رفعت منسوب الواد اللي كيعبر مركز الجماعة، وغمرات عدد من الأزقة والديور، وخلفات خسائر مادية مهمة. هاد الوضع زرع الرعب وسط الساكنة اللي بقات سهرانة طيلة الليل و كا تحاول تحمي ممتلكاتها.

السلطات المحلية دخلات على الخط من بعد، وبدات كتقيم حجم الأضرار وكتوجد تدابير لحماية السكان، فحين انتشرت فـ”الفيسبوك” و”التيك توك” مقاطع فيديو كا توثق قوة الفيضان وحجم الخسائر، وكتعيد للذاكرة حوادث مماثلة عرفتها المنطقة فسنين سابقة.