كود سبور//

واصل الدولي المغربي الشاب الياس بنصغير نجم موناكو الفرنسي، حصد الإعجابات من متتبعي كرة القدم الأوروبية، بالأداء اللي كايقدم سوا مع المنتخب المغربي أو مع موناكو.

وهذه المرة جريدة ليكيب الفرنسية، خصصت ملف على إلياس بنصغير، وقالت أنه أحسن لاعب وسط هجومي كايقدر يزيد بموناكو للقدام فالتيران، حيث الشوفة ديالو والجسم عندو ديما موجهين للقدام وكايشوف بسرعة

وصنفت الجريدة الفرنسية، إلياس بنصغير ضمن نوع اللاعبين المبدعين المهدد بالانقراض واللي ما خاصش يتحاسبو على عدد الكواري اللي كايضيعو، وهما فنفس الوقت مطالبين باش يديرو التوازن بين ما هو إيجابي فاللعب ديالهم والمغامرة، وأكدت أن هذا النوع ديال اللاعبين بحال كيفين دي بروين حتى فينيسيوس جونيور، غالبا ما كايكون عندهم اختلال فهاد التوازن، وكايكون عندهم الديشي كثير (كايضيعو الكواري).

وكملت “ليكيب” أن إلياس بنصغير مول الرقم 7 يغلط مسموح له يغلط فموناكو، حيث غالبا هو اللي كايدير الخطر على الخصم، وأكدت أنه لاعب من النخبة وفبطولة فرنسا هو اكثر اللاعبين اللي كايطيحو الكورة بين رجليهم، ويقدر يزيد بها على الاقل 5 مترو للقدام، وحقق فيها معدل 82 متفرق على موس سيمون لاعب نانت، وعلى عثمان ديمبيلي لاعب باريس سان جرمان، وهذا الشي كايخلي البروفايل ديالو نادر وهو ثاني لاعب صنع اكبر عدد من الفرص بـ11 تسديدة مؤطرة و7 تمريرات.

وهضرت الجريدة الفرنسية ايضا على المسار الدولي ديال الياس بنصغير مع المنتخب الوطني المغربي، وقالت أن البداية ديالو مميزة مع الأسود بعدما لعب معه 6 الماتشات
ماركا فيهم 3 أهداف، والمساهمة ديالو فالتتويج بالميدالية البرونزية ديال أولمبياد باريس.