كود سبور//

بعدو الجيش الملكي بصدارة البطولة الاحترافية لكرة القدم على المطارد ديالهم الرجاء الرياضي، بعدما ربحو نهضة بركان اليوم الاربعاء فتيران بركان، برسم مؤجل الدورة 20.

وسالا الماتش بين نهضة بركان والجيش الملكي بنتيجة 2 لواحد لمصلحة ليفار، اللي ماركاو هما الأولين فالماتش بواسطة أمين زحزوح من كوفرة واعرة فالدقيقة 13، وجابو براكنة التعادل من بيلانتي ماركاه يوسوفو دايو فالدقيقة 31، ولكن ليفار رجعو ضربو الهدف الثاني عن طريق ربيع حريمات من بيلانتي فالدقيقة 45، وفالشوط الثاني ضغطو نهضة بركان باش يماركيو التعادل ولكن ما قدروش بسبب التسرع وقلة التركيز وقدرو ليفار يحافظو على الرباح حتى سالا الماتش.

وبهذه النتيجة خداو الجيش الملكي 3 بوان مهمة رفعو بها رصيدهم إلى 52 نقطة، وبعدو بها بصدارة البطولة الاحترافية على الرجاء الرياضي بفارق 4 نقاط، أما نهضة بركان بقات عندهم 30 نقطة وكيحتل الفريق المركز 6 مع 2 ماتشات مؤجلين.