كود سبور//

هربو الجيش الملكي بصدارة البطولة الاحترافية لكرة القدم، بعدما ربحو اليوم اتحاد طنجة فماتش دخلو الأخير فتيران القنيطرة، ضمن الدورة 22.

وسالا الماتش بين الجيش الملكي واتحاد طنجة بنتيجة 2 لواحد لمصلحة ليفار، وماركاو العساكر الهدف الاول توميسانگ اوريبوني فالدقيقة 53، وجابو اتحاد طنجة التعادل بواسطة يوسف شينة فالدقيقة 81، وليفار قدرو يربحو بهدف قاتل فاللحظات الأخيرة بواسط ربيع حريمات من بيلانتي.

الجيش الملكي بهذا الرباح خداو 3 بوان مهمة عززو بها صدارة البطولة الاحترافية برصيد 49 نقطة مع ماتش ناقص، وعلى بعد 4 نقاط من الرجاء الرياضي مول المركز الثاني اللي مازال غيلعب غدا الاحد ضد اولمبيك اسفي، اما اتحاد طنجة وبهاد الخسران فبقى فالمركز 14 وعندو 21 نقطة.