گود سبور//

تأهل فريق الجيش الملكي لنهائي دوري أبطال إفريقيا للمرة الثانية فالتاريخ ديالو، بعدما تفوق على فريق نهضة بركان فالدومي.

وسالا ماتش روتور دومي فينال شومبيونزليك بين نهضة بركان والجيش اليوم السبت فالتيران البلدي فبركان، بنتيجة واحد لزيرو لمصلحة الفريق البركاني، وهو الهدف اللي قدرو يماركيوه البركانيين فالشوط الثاني بواسطة البحيري من بينالتي، ولكن ما قدروش يزيدو اهدف اخرى، واخا سيطرو على الماتش والاستحواذ د الكورة كان عندهم.

هذه النتيجة عطات التأهل لفريق الجيش الملكي، حيث كانو ربحو نهضة بركان فماتش الذهاب فتيران مولاي عبد الله بالرباط بنتيجة 2-0، وبالتالي فمجموع نتيجة الذهاب والإياب هي لمصلحة ليفار بـ2-1.

وغادي يلعبو فريق الجيش الملكي ثاني فينال فتاريخ فدوري ابطال افريقيا بعد نهائي 1985، وهو النهائي اللي كانو ربحو اللقب ديالو، وهو اللقب الوحيد اللي عندهم، والفينال ديال 2026 غادي يلعبوه ضد ماميلودي صن داونز الجنوب افريقي، الذهاب غادي يكون فجنوب افريقيا والروتور فالرباط.