كود – كازا //

بينات الجريدة الفرنسية Le Figaro فتصنيف جديد أن الأقسام التحضيرية فالمغرب هي الأحسن برا فرنسا بالنسبة للطلبة اللي كيدوزو مباريات الولوج للمدارس العليا الفرنسية.

هاد التصنيف ركّز بالخصوص على نتائج الطلبة فالمباريات ديال المدارس الكبرى، وعلى راسها École Polytechnique، اللي كتعتبر من أكثر مدارس تكوين المهندسين انتقائية ففرنسا.

وحسب هاد التصنيف، المؤسسات التعليمية المغربية خدات المراتب الأولى الشي لي كيبين القوة ديال نظام الأقسام التحضيرية فالمغرب وجودة التكوين اللي كيتلقاو الطلبة اللي باغيين يكملو قرايتهم فالمدارس العليا الفرنسية.

وفالمرتبة الأولى جات Lycée Mohammed VI d’Excellence فبنجرير، لي  17,7% من الطلبة ديالها فهاد الثلث السنين  الأخيرة قدرو يلتحقو بمدرسة البوليتكنيك فشعب الرياضيات-الفيزياء (MP) والفيزياء-التكنولوجيا (PT). ومن بعد جاو Lycée Méditerranéen فـتطوان بنسبة 8,8%، وثانوية Lycée Al Zahraoui فالرباط بنسبة 7%.

كما جاب ترتيب العشرة الأوائل مؤسسات مغربية أخرى، من بينها Lycée Moulay Idriss بفاس، وثانوية Lycée Ibn Timiya بمراكش، وثانويتا Lycée Mohammed V وLycée Mohammed VI d’Excellence Casablanca بالدار البيضاء، إضافة إلى Lycée Ibn Ghazi فالرباط، اللي حتى هي سجلات نسب مهمة ديال الولوج لمدرسة البوليتكنيك سنة 2026.

وفالشعب الاقتصادية والتجارية حتى هي، المؤسسات المغربية بانت بقوة. حيث احتلات مجموعة مدارس Groupe Scolaire La Résidence فالدار البيضاء المرتبة الأولى فشعبة ECG، بعدما تقبلو 19 مترشح فمدارس فرنسية مقابل 14 عملية إلحاق ، وجاو من بعدها الأقسام التحضيرية ديال لا ريزيدونس فبوسكورة، وثانوية ابن غازي فالرباط.

أما فشعبة ECT (المسار التكنولوجي الاقتصادي والتجاري)،  تصدرات ESTEM فالدار البيضاء الترتيب، مع قبول 36 مترشح مقابل 33 عملية إلحاق.

وحسب تحليل جريدة لو فيغارو، الحضور القوي ديال المؤسسات المغربية فهاد التصنيف راجع أساسا للاهتمام الكبير اللي كيعطيه المغرب لنظام الأقسام التحضيرية. لي كيلتحق به سنويا  10 آلاف تلميذ، وغالبا كيكونو من بين أحسن التلاميذ على الصعيد الوطني.

https://etudiant.lefigaro.fr/article/etudes/notre-palmares-des-meilleures-classes-preparatoires-a-l-etranger-en-2026-20260311/