كود سبور//

سالات أولمبياد باريس 2024، اليوم الأحد، فالعاصمة الفرنسية بإقامة حفل كبير شاركو فيه الأبطال والوفود اللي شاركت فيه، وتم فيه أيضا تسليم العلم الأولمبي لمدينة لوس أنجلوس الأمريكية اللي غاتنظم الألعاب الأولمبية فعام 2028، وخدا الممثل الأمريكي توم كروس العلم وركب على موطورو وركب فالطيارة ونقز منها وسلمو فهوليود الأمريكية.

وبالنسبة للرياضية المغربية فكانت المشاركة فأولمبياد باريس2024، خيبة بزاف وعنوانها الفشل، باستثناء تتويج العداء سفيان البقالي بالميدالية الذهبية والمنتخب المغربي لكرة القدم بالبرونزية.

واستلام لوس أنجلوس علم أولمبياد 2028، خاص يكون إعلان على انطلاقة جديدة للرياضية المغربية، تبدا معها الخدمة، وتغيير المسؤولين ورؤساء الجامعية اللي سكنو بزاف فالمناصب ديالهم لسنوات وعقود بدون إنجازات تذكر، وكان الفشل هو عنوان تسييرهم للجامعات.

خاص تحريك المياه الراكدة فالرياضة المغربية، وإقالة رؤساء الجامعات اللي فشلو ومحاسبتهم، ومنح الفرصة للكفاءات وصحاب الاختصاص وفق منظومة وبرامج ومشاريع إعداد أبطال للمستقبل القريب والمتوسط والبعيد، باش يقدر المغرب يحقق ألقاب خلال السنوات القادمة فالبطولة القارية والعالمية فمختلف الرياضات وبعدها يقدرو الرياضيين المغاربة يربحو ميدالية ابتداء من أولمبيا لوس أنجلوس 2028.