كود هناء ابو علي ///

فاطمة الزهرا المنصوري وزيرة السكنى وسياسة المدينة والتعمير وفنفس الوقت عمدة مراكش تحولات لناقلة لكلام رئيس الدولة محمد السادس. شفناها ففيديو فالحوز واخر فشيشاوة وثالث فازيلال ورابع … كتهدر مع المتضررين ضحايا الزلزال العنيف اللي ضرب الحوز والنواحي الجمعة 8 شتنبر 2023 مع لحداش و10 دقايق. كتخاطب هادو بهاد العبارة: قاليكم سيدنا”. “جيت لاني صيفطني سيدنا عندكم”.

لوزيرة بنت الباشا كتأكد باللي صيفطها سيدنا. كتنقل كلام سيدنا. غير هي ما قالت اشنا هي الصفة ديالها. مرة كتهدر “حنا كوزارة الاسكان غاديين نجندو كاملين ونهبطو برنامج سيدنا” اي كتكلم كوزيرة. صيفطها محمد السادس كوزيرة. مرة كتهدر كعمدة لمراكش “كنعاود نقول ليكم. انا العمدة ديالكم”.

هنا كلشي كيتخربق. علاش رسل رئيس الدولة هاد لوزيرة بالضبط تتكلم باسمو؟ واش حقاش مراكشية؟ ولا حقاش عمدة مدينة مراكش؟ ….

علاش رئيس الدولة اختار وزيرة من البام وعندها كاسكيط ديال رئيسة المجلس الوطني للحزب٬ باش تخاطب الناس. تتكلم باسم الملك.

حتى فاخراج خرجاتها مرة دايرين بيها لمخارنية. مرة دايرين بيها الكاميرات والناس. مرة دايرين بيها لعيالات. فكل الحالات كيتصورو فيديوات كيصيبوهم ناسها فالتواصل قريبة من المواطن.

هنا كاين مشكل. هاد العمدة فشلات حتى تحل مشكلة ايواء الملاح وسط مراكش. “كود” دارت جوج ربورطاجات على هاد القضية. عدد من السكان رافضين ينتاقلو للداوديات. كيقولو باللي السلطة باغية تقولبهم. دايرين خيام وحالفين لا خرجو الا ايلى جابو ليهم سكنى.

قضية الملاح معقدة بزاف. غير كيفاش وحدة تحولات ل”صيفطني سيدنا” فشلات تحل هاد المشكل باغية توصل اش قال سيدنا.

باش عمدة تفشل فقضية بحال هادي على الاقل خاصها دير مجهود كبير لحلها.

دابا المنصوري اللي ولات “صيفطني سيدنا” شكون يقدر يهدر معاها لا فالحكومة ولا فالحزب. بلادنا وكنعرفوها. راها ولات فوق كلشي. فشلات فحل مشاكل داخلية فمراكش وتعطاتها مسؤوليات اكبر منها