الرئيسية > آراء > لهاجر الريسوني بواكي لكن الدكتور بلقزيز لا بواكي له
03/10/2019 16:00 آراء

لهاجر الريسوني بواكي لكن الدكتور بلقزيز لا بواكي له

لهاجر الريسوني بواكي لكن الدكتور بلقزيز لا بواكي له

محمد سقراط-كود///

أكبر ضحية ومتضرر حقيقي في ملف هاجر هو الطبيب بلقزيز لي من بعد ماتقلد وسام ملكي على ود الكفائة المهنية ديالو وشنو عطا للبلاد فمجال الطب، هاهو فآخر مسيرته المهنية يولي كيدوز الحبس مع ولد مليكة فالزاكي بسبب الإجهاض لي هو عمل نبيل خاصو عليه وسام واحد آخر، أما هاجر وصاحبها حقا الحبس تكرفيص وعذاب ولكن راهم باقين شباب صغار والحياة كلها باقا قدامهم والله يطلق سراحهم، ولكن عرفتوا شناهي عامين ديال الحبس لدكتور حامل لوسام ملكي، يصبح يدور فالكور مع خوطوطو والقتلة والمغتصبين راه كارثة حقيقية.

هادي فرصة حقيقية للنخب ديال هاد البلاد باش تضغط من من اجل تغيير بحال هاد القوانين لي يخليو طبيب كبير يولي مليوح  ومكرفص فالحباسات على آخر أيامو، ويخليو شباب ماقاتلين ماسارقين مامغتاصبين محكومين بعام ديال الحبس للواحد غير حيت بغاو يتخلصو من حمل غير مرغوب فيه، قوانين بحال هادي لي كتدخل فالأحشاء ديال بنادم وتخلي الدولة تقررليه فبلاصتو شنو خاص يدير ومايديرش فكرشو، راه ملي كتجرم الإجهاض بالطرق الطبية السليمة كيعني مباشرة أنك كتشجع على الشعودة والخزعبلات ديال العطارة والإستغلال المنظم ديال بنات لعبات بيهم الحياة وقررو أنه يتخلصو من حمل غير مرغوب فيه، وكيبقاو يتلاقفوهم الحيوط وكيلقاو الطريق لعملية إجهاض سليمة عامرة بالخزعبلات والعشوب وهدرة الشارفات، وشحال من وحدة فقدات حياتها غير حيت بغات تطيح الحمل، بالإظافة الى الثمن الغالي بحكم أنه حاجة ممنوعة وفيها مخاطرة للطبيب، فعادي ان الثمن يكون زايد على كون كان الأمر قانوني وكاع العيادات كيديروه.

لهاجر الريسوني بواكي لكن الدكتور بلقزيز لا بواكي له على فايسبوك كولشي صدمو العام ديال الحبس لي خدات هاجر وصاحبها، ولكن العامين لي خدا الطبيب والاحكام الأخرى في حق الطاقم ديالو تاواحد مصدماتو، للأسف الصدمة الحقيقية هي دكتور بداك المستوى ماداير لا خطأ طبي منسى مقص في كرش شي حد ما تاجر بالأعضاء فقط متهم بالإجهاض، ولائحة تهم أخرى قروسطية، واش الفين وتسعطاش وباقي بنادم يدخل للحبس على ود علاقة خارج اطار الزواج، راه الى بقينا هاكة غادي يجي واحد الوقت غادا تولي السعودية متفتحة علينا.

موضوعات أخرى